1, 2. Ka burí sügǘ adügübei lun wasufurirun ani ka álügüdahani hadügübei saragu gürigia?

LIDAN aban ageiraü le günringua laali wuribu, ñeiñein meha aban ageindaguni le ñein lubéi hounwe saragu milu würiña hama irahüñü. Bunawatiña sun gürigia hagía lidan aban huyu lau bandi lirahüñü gurúa le uágubei bürüwañu lan: “Ka uagu?”. Anihán álügüdahani létima hadügübei gürigia ha ásügürübaña lídangiñe lanarime igarigu. Álügüdahatiña lau íruni dan le hóunwegun haduheñu madurunga lidan aban wuribu, aban hárabaganali, lau sandi, o ladüga anarimeni, féridi hamutu haban luma burí amu turóbuli. Busentiña hasubudiruni ka lan uagu lasusereda lamiselu burí le houn.

² Ka uagu lígira Heowá Bungiu lun wasufurirun? Anhein suntigabafu lubéi, hínsiñehabuti, chuti lau ani richaguati, ka uagu gibe lubéi iyeerehabuni luma marichaü ubouagu? Adügañaha humaali san álügüdahani burí le húniwagua?

3, 4. a) Ka hénpulu arufudubalin mariban lan lalügüdahóun ka lan uagu lígira Heowá lun wasufurirun? b)Ka lasaminarubei Heowá luagu wuribani luma asufuriruni?

³ Wuribati funa san wálügüdahan ka lan uagu lígira Bungiu lun wasufurirun? Añahein afiñetiña anhein lan hadüga,  harufuduña lan liluouguan afiñeni o meneben lan Bungiu houn. Gama lumoun, dan haliihanu Bíbülia harihiba íbini lan lubúeingu Heowá ha úaraguatiña adügatiña álügüdahani libeina le. Aban hénpulu, ariñagati profeta Abakúku lun Heowá: “Ka san uagu barihagüdana saragu idiheri luma wuribani? Geyeguniña lau anarimeni luma günringuaü; anihein wuribu lidan sun fulasu” (Abakúku 1:3).

⁴ Adeinhati san Heowá lun Abakúku luagu lálügüdahan? Uá, lubaragiñe lira, adügati lun labürüdǘniwa dimurei furanguti le tidan Bíbülia. Íderagua lumuti giñe gunfurandei katei le buidu, luma lun laganwoundun lafiñen. Busenti Heowá ladügüni ligíameme huagu. Haritagua humá arufudaha tan Bíbülia: “Lóunigiruñadün le tímatimaati” (1 Féduru 5:7). Iyeeregutimati wuribani lun Heowá luma asufuriruni le lanügübei, sügǘ lau lun furumiñeguarügü gürigia (Isaíasi 55:8, 9). Kati uagu gibe lubéi asufuriruni ubouagu?

5. Ka burí resun ichugúbei lun lafuranguagüdüniwa ka lan uagu wasufurira, ani ka tarufudahabei Bíbülia?

⁵ Saragu gürigia lidan ámuñegueinarügü relihión álügüda hamaaña lábutigu hani relihión ka lan uagu wasufurira  saragu. Aba hóunabuniña ligía lan lugundanbei Bungiu ani lüha lan desidírü lani le lunbei lasuseredun íbini lamiselu. Ariñagatiña houn gürigia siñá lan gunfuranda wamani lémeri Bungiu, ani barǘ lániña gürigia íbini irahüñü lúmaguoun sielun. Ani, kei aubei hafureindeirei, maweiyasunti Bungiu adüga ni kata wuribati. Ariñagatu Bíbülia: “Maritagua humá luagu adüga lan Bungiu Suntigabafu wuribani odi marichaü!” (Hobu 34:10).

6. Ka uagu híchigei saragu gürigia duru luagun Bungiu luagu sun asufuriruni le ubouagubei?

⁶ Subuditi hun ka lan uagu hacharara gürigia lau híchuguni duru luagun Bungiu luagu sun asufuriruni? Ladüga gíbetiña afiñetiña Bungiu lan le suntigabafu arúeihabalin ubóu le. Ibidiñeti aban inarüni sensiyuti ani súdiniti houn, le tarufudahabei Bíbülia ani furendei humaali lidan kapítulu 3 tidan líburu to. Satanási lan arúeihabalin ubóu le.

7, 8. a) Ida liña larufuduni ubóu le ligaburi le arúeihabalin? b)Ka uagu lanüga figóu luma lábürühan lamiselu woun “lidan magaradahan” wamá asufuriruni?

⁷ Furanguti tariñagun Bíbülia “lábugiñeñanu lan lubafu Mafia sun ha lánigubaña ubóu” (1 Huan 5:19). Ma afuranguagüda lumuti le sun katei? Arufuda lumuti ubóu le, ligaburi sífiri marihúaditi “le eyeedubalin sun ubóu” (Arufudúni 12:9). Lau iyeeni, iyeerehabuni, luma furundei lóusera Satanási. Ligía buin liña lubéi ubóu le lábugiñebei lubafu lau iyeeni, iyeerehabuni luma furundei. Anihán furumiñeti resun anihein lubéi saragu asufuriruni.

⁸ Libiaman resun ariha wamuti lidan kapítulu 3, lúmagiñe lan lebedaagun wügüri lidan fuluri-agei Edén, gafigounti. Ligíati hínsiñe lubéi ubafu lun ani ageindaguati lun libihini, barüti le wuribu, amudihani luma asufuriruni (Apurichihati 4:1; 8:9). Lǘrüwan resun le adügübei lun wasufurirun lábürühan lamiselu woun “lidan magaradahan” wamá (aliiha huméi Apurichihati 9:12). Madouragunti Heowá lau ubóu le ladüga mama lan ligía arúeihabalin. Ligíati gayara lubéi  hasufurirun gürigia dañu ladüga lidanñanu lan somu fulasu lidan luriban oura.

9. Ka uagu gayara lubéi wachoururuni gama lan Heowá aban buiti resun lun lígiruni asufuriruni?

⁹ Ruti dǘgüdaguaü lasubudirúniwa mama lan Bungiu lébunabei asufuriruni. Mama lidurun sun wuribu, áfarahani, amudihani luma hárabaganali le anügübei saragu igarigu houn gürigia. Gama lumoun, megeigidiwa wasubudiruni ka lan uagu lígira lun ñein lan sun asufuriruni le. Anhein suntigabafu lubéi, chóuruti gabafu lan lun lagidaruni. Kati uagu madügün lubalin? Kei subudi wamaali lubéi Heowá ani ariha wamaali aban lan Bungiu hínsiñehabuti, chouru wamuti gama lan aban buiti resun lun lígiruni (1 Huan 4:8).

10. Ka lasigenehabei Satanási, ani ida liña ladügüni?

¹⁰ Lun wasubudiruni ka lan uagu lígira Bungiu lun wasufurirun, mosu wagiribudun lidoun dan le lagumeserunbei sun turóbuli. Dan le libihinbei Satanási lun maganbadi lan Adán tuma Ewa lun Heowá, aba lagumeserun turóbuli sériuti ligía. Masigenehanti Satanási luagu lubafu Heowá ladüga subudi lani mébeha lan, lasigenehaña luagu Liricha lun larúeihan. Lau lariñagun yee lan Bungiu ani mígirun lan lun hagundaarun lubúeingu lau burí katei buiti, lariñaguña Mafia luagu wuriba lan larúeihan Bungiu (aliiha huméi Agumesehani 3:2-5). Lariñaguña giñe buídutimabei lan lidin houn gürigia ánhaña marúeihan lan Bungiu. Ítara liña ladimurehan iyeeni luagu liricha Heowá lun larúeihan.

11. Ka uéigiñe magumuchun lubéi Heowá hau ha ebedaagubaña lidan fuluri-agei Edén?

¹¹ Dan le lebedaagunbei Adán tuma Ewa lun Heowá, kéisigubeirügü hariñaguña lan: “Memegeirúntiwa lun larúeihaniwa Bungiu. Gayarati desidírü wamani woungua le buídubei luma le wuribabei”. Ida luba san laranseruni Heowá  turóbuli le? Ida luba san larufuduni houn sun sífiri gürigia chu tau maricha hamá ebedaagutiña ha, ani manera lan le aubei ladügei katei ligíatima lan buídubei? Añahein saminatiña aba lan hamuga lagumuchun Heowá hau ebedaagutiña lun ladügün amu wügüri tuma amu würi. Gama lumoun, ariñaga laali meha lisuini lun ladügǘniwa Ubóu ábanme paraísu lun labuinchun hau ladügawagun Adán tuma Ewa (Agumesehani 1:28). Ani súnwandan lagunfuliruni lisuini (Isaíasi 55:10, 11). Lun hamuga giñe lagumuchun hau ebedaagutiña hagía lidan fuluri-agei Edén, maranserunbei yebe turóbuli luáguti Liricha lun larúeihan.

12, 13. Ka uma gayara lan konpararü wamani ka lan uagu lígira Heowá lun larúeihani Satanási ubóu luma lun harúeihan gürigia houngua?

¹² Konpararü waméi luma aban máisturu le arufudahabei houn aturiahatiña ida luba lan haranserun aban turóbuli hénrenguti lánina matemátika. Sódini, aba lebedaagun aban aturiahati, aba lariñagun wuriba lan manera le layusurubei máisturu lun laranseruni turóbuli ligía, lariñaguña lau lira marufudahadi lan máisturu. Asigenehati giñe subudi lan aban manera buítimati lun laranserun turóbuli ligía. Afiñetiña  fiú lánigu paaná garicha lan, aba giñe hebedaagun. Ka san lunbei ladügüni máisturu? Gayarati hamuga labugaguniña, gama lumoun, kaba hamuga san hasaminara ha híbiri? Gayarabei hasaminarun hanufude lan máisturu larufudúniwa marufudahadi lan, ani garicha lan hani paaná hama ha úaradubaña luma ani meneben halime houn. Guentó samina humá lun hamuga lígiruni máisturu irahü larufuduni ida luba lan laranseruni turóbuli le.

¹³ Adügati Heowá aban katei libe le ladügübei máisturu. Mámarügüñanu ha ebedaagubaña fuluri-agei Edén lidan turóbuli ligía. Ñeinñanu meha saragu míñunu ánheligu arihei le asuseredubei (Hobu 38:7; Danieli 7:10). Ligaburi lahandilihani Heowá ebedaaguni ligía, ganiti óunwenbu efekütu hawagu ánheligu, ani lau lásügürün dan, hawagu gürigia. Kati ladügübei Heowá? Ígirati lun larufuduni Satanási ida luba lan larúeihaniña gürigia. Ígirati giñe lun harúeihan gürigia houngua lábugiñe lalidihan Satanási.

14. Kaba san buiti lanüga desidírü lan Heowá lígiruniña gürigia lun hagía guánarügü lan arúeiha?

¹⁴ Subudi lumuti máisturu le uágubei wadimureha maricha lan nibureinti le ebedaagubei hama lánigu paaná, subudi lumuti giñe anhein lan ígira lun hóuchun haranseruni turóbuli, lanügüba lan buiti houn súngubei. Ítara, danme larufudúniwa luagu chara hamá ebedaagutiña, hasubudirubei aturiahatiña ha harumabaña anigi, máistururügüñein lan gayara líchuguni külase. Gunfuranda habéi giñe ka lan uagu labúgaña ebedaagutiña ha. Ítarameme, subudi lumuti Heowá lanügüba lan buiti houn sun ánheligu hama gürigia ha harumabaña anigi danme le harihin maricha lan Satanási hama ánheligu ha ebedaagubaña, harihuba giñe siñagua hamá gürigia houngua lun harúeihan. Hafurendeirúba inarüni lan le lariñagubei profeta Heremíasi: “Mama wügüri laburemebei lémeri, siñá lumuti giñe wügüri le éibugubei lupasun ásururagüda” (Heremíasi 10:23, RVA).

15, 16. a) Ka uagu lígira Heowá lun ladurarun asufuriruni saragu dan? b)Ka uagu madügün lubéi ni kata lun masuseredun lan lanarime áfarahani luma amu burí lamiselu?

¹⁵ Kati uagu lígirunbei Heowá lun ladurarun asufuriruni saragu dan? Ka uagu madügün lubéi ni kata lun masuseredun lan katei wuribati? Samina wamá luagu bián katei le lunbei madügün lani máisturu le buga uágubei wadimureha. Furumiñe, meredehan lubéi aturiahati ligía lun lóuchun larufuduni ida luba lan laranseruni turóbuli, libiaman, míderagun lubéi aranserei. Ítarameme anihein giñe bián katei le desidírü lubéi Heowá madügün lubéi lan. Furumiñe, meredehan lumuti Mafia lun lóuchun larufuduni garicha lan. Ligíati mégei lubéi lígirun lásügürün dan. Lidan saragu milu irumu le sügühalibei hóuchaña gürigia sun luwuyeri arúeihani ani awanseña lidan siensia luma lidan laturiahoun amu burí katei. Gama lumoun mararamungili laganwoundun marichaü, wuribani, gudemei, luma burí wuribu. Arufudúali buidu luagu mawanserun lan arúeihani ubouaguna.

¹⁶ Libiaman, míderagun lumuti Heowá Satanási arúeihei ubóu le. Lun hamuga mígirun lan Bungiu lun lasuseredun lanarime áfarahani luma burí amu lamiselu, ma líderaguñanu hamuga ha ebedaagubaña? Ma wasaminaruba yebe gayara lan warúeihan wagía guánarügü sin lasuseredun katei wuribati? Anhein hamuga óusera Heowá ítara, lúaraduña hamuga luma aban iyeeni. Gama lumoun, siñati “leyeehan Bungiu” (Ebüréu 6:18).

17, 18. Kaba ladüga Heowá lau sun dañu le lanügübei arúeihani ubouaguna luma lubafu Satanási?

¹⁷ Kábati ariñawagúa luagu sun dañu le lanügübei ebedaaguni kóntüra Bungiu? Haritagua wamá suntigabafu lan Heowá. Ligía gabafu lubéi lun laransehani sun dañu ligía, ani ladügübei. Kei wafurendeiruni, lafansehabei Heowá sun dañu le adügǘbei lun Ubóu, ábame ladügüni paraísume. Seremei hafiñen luagu lani Hesusu sákürifisiu, halíbüreruba gürigia  luéi figóu luma lani resultóu. Houn ha hilaañabaña águyuguniba afansehei sun dañu le lanügübei óunweni. Ítarati layusurubei Heowá Hesusu “lun lagünrichaguni luadigimari Mafia” (1 Huan 3:8). Ladügübei Heowá sun katei le lidan dan le buídutimabei lun. Seremei gaguraasun lan woun wibihinbei chansi lun wafurendeiruni inarüni ani seriwi waméime (aliiha huméi 2 Féduru 3:9, 10). Lubaragiñe lachülürün dan ligía, láluahañanu Heowá gürigia ha busenbaña háhuduragun lun lau taruman hanigi, íderagua laña awandei asufuriruni lidan ubóu le buinbei lau saragu turóbuli (Huan 4:23; 1 Korintuna 10:13).

¹⁸ Háfuga saminatiña gürigia uabei lan yebe sun asufuriruni le, lun hamuga adüga lani Heowá Adán tuma Ewa lun siñá lan hebedaagun. Lun hasubudiruni ka lan uagu madügün lubalin, haritagua humá luagu aban idewesei le adüga laalibei Heowá woun.

19. Ka idewesei gebegiti líchugubei Heowá, ani ka uagu mosu lubéi gebegi lan woun?

¹⁹ Furendeitiwa lidan kapítulu 5 adüga lániwa Bungiu lau iarani lun desidírü wamá kaba lan wadüga. Rutün san fe luagu lueirin lebegi idewesei le? Adügati giñe Heowá saragu animaalu, gama lumoun masaminaruntiña lubá hadügüni katei (Ariñawagúni 30:24). Ani adügaali wügüri máhina sétilei lun ladügüni le unbei lesetirúa. Gúndaabadiwa hamuga san lun ladügüniwa Bungiu ítara? Uá. Ligía wagundanbei lau líbüre wamá lun desidírü  wamani kaba lan hawuyeri gürigia wagía, ida luba lan wabagaridun, ani kaba lan wamadagu. Hínsiñeti idewesei le woun, ani busenti Bungiu lun wayusuruni.

20, 21. Ida luba san gayara lan wayusuruni idewesei le weresibirúbei lidan lubuidun manera?

²⁰ Mabusenrunti Heowá weseriwiduni ladüga wafosurún (2 Korintuna 9:7). Ka himei habéi agübürigu: lariñagun hasaani houn “Hínsiñetibu nun” ladüga lafosurún o ladüga tídangiñe lan lanigi láfurida? Ligíati, álügüdagua humá hungua: “Ida luba san nayusuruni idewesei le ru laalibei Heowá nun?”. Hanarimeti luriban layusuruni Satanási, Adán tuma Ewa idewesei le, ladüga hadisedun luéi Heowá Bungiu. Agia huguya? Kaba san hadüga?

²¹ Gayarati hayusuruni lubuidun idewesei le, lau manera le buítimaabei. Gayarati hóundarun hama saragu míñunu gürigia ha luéigiñebaña lóubadina Heowá. Gúndaagüda hamuti Heowá, ladüga arufudatiña yee lan Satanási ani wéiriti luriban larúeihan (Ariñawagúni 27:11). Gayarati hadügüni ligiaméme lau hanúadiruni ibagari le buítimaabei. Lidan kapítulu 12 hafurendeirubei katei lan ibagari ligía.