GUMESE HUMÉI YANU
ARUFUDAHANI 4
Ǘnabugu humá
Adundehani tídangiñeti Bíbülia: “Lau […] ǘnabuguni, […] buidulá hanügüniña amu gürigia huéi guánarügü” (Fili. 2:3).
Le meha ladügübei Pábulu
1. Ariha huméi BIDÉU o aliiha huméi Adügaü 26:2, 3. Ábameti hasaminarun luagun álügüdahani burí le:
-
Ida liña meha larufudun Pábulu ǘnabuguni lau ligaburi layanuhan lun urúei Agürípa?
-
Ida liña ladügün Pábulu lun mama lan luouguoun lachawahei larihin urúei Agürípa, lun lúnrügü lan Heowá luma tun Lererun letenira urúei ligía? (Ariha huméi Adügaü 26:22).
Ka wafurendeirubei lúmagiñe Pábulu?
2. Ménrenguntimabei haganbuni gürigia uganu le wanügübei houn ánhawa ayanuha houn lau inebesei luma ǘnabuguni.
Áyeiha huméi Pábulu
3. Ayanuha humá lau inebesei. Madüga humá lun hasandirun gürigia ibidiñe lan ni kata houn ani subudi humani sun katei.
4. Furangulá tídangiñeti lan Bíbülia sun le harufudahabei. Gayaraati tánhingichunu Lererun Bungiu hanigi gürigia. Dan le wayusurunu lun warufudahan houn gürigia, íderagua wamutiña lun chouru lan lébuna hafiñen.
5. Óusera humá lau gamadóuni. Masigeneha humá lun harufuduni huguya lan garichabei. Líderagubadün ǘnabuguni lun magañidun humá luma lun hasubudiruni ka lan dan buídutimabei lun hadüraaguni hiyanun luma somu gürigia (Ari. 17:14; Titu 3:2). Anhaün óunaba lau aban lubuidun igaburi, másiñati aranseñu luba lan gürigia ligía lun laganbunün dánmeya le hayanuhan luma amu weyu.
