Aban áriebu, aba gewenedü lan urúei Nabukodonosoru aban uénedü ámuti. Wéiriti meha lidiheri luagu le gewenedü lubéi darí lun lagidarun lidabagu. Wati houn garíaahatiña, lariñaga houn: “Ariñaga huméi nun ka lan mini lubéi nuénedü”. Ábati hariñagun lun: “Abahüdagua huméi huénedü woun, urúei”. Lariñaga Nabukodonosoru houn: “Uá! Huguyalá ariñagei nun ka lan nuénedübei o náfaraguaadün hilagubei”. Ábaya hariñagun lun: “Abahüdagua huméi huénedü woun, ábameti wariñaguni hun ka lan lílabei”. Lariñagati houn: “Sun huguya busentün heyeedunina. Ariñaga huméi nun ka lan nuénedübei!”. Aba hóunabuni: “Úati gayaraati ladügüni lira. Siñati ladügǘniwa le hamuriahabei”.

Aba lagañidun Nabukodonosoru saragu darí lun líchugun gumadi lun háfarawagun sun chu tau ha Babilóniabaña, Danieli, Sadürákü, Mesakü luma Awedi-negó haganagua. Amuriahati Danieli dan luma urúei. Ábati lafurieidun dandu ligía kei lumadagu lun Heowá lun líderaguniña. Ka ladügübei Heowá?

Arufuda lumuti Heowá luénedü Nabukodonosoru lun Danieli lidan aban arufudúni, ariñagaléi lun ka lan mini lubéi. Laruganbei, aba lidin Danieli lumoun lubúein urúei, ábati lariñagun lun: “Máfaraguabaña chu tau. Nariñagaali lun urúei ka lan mini lubéi luénedü”. Aba lanügüni lubúein urúei Danieli lumoun Nabukodonosoru. Lariñaga Danieli lun urúei: “Arufuda laali Bungiu hun kaba lan asusereda ámuñegü. Anihán huénedübei: arihatün aban óunwenbu guáriua. Golu lábulugu, pülata laniguagu luma larüna, kóbüre luragei luma liyada, gürabu lúruna, ánheinti lugudi, líbiri gürabu, líbiri múa. Bíwati aban dübü luéigiñe aban wübü, aba lidin áfara luagu lugudi guáriua. Ábati labouchaguni darí lun lasaliragun kalikime, lárigiñe, aba lanügüni garabali kaliki. Ánheinti dübü, saliguati ábanme óunwenbu wübü le abuinchubalin sun ubóu”.

 Lárigiñe, ariñagati Danieli: “Anihán le mini lubéi huénedü: harúeihan abulugúbei golu. Pülata, arúeihani le lunbei liabin lárigiñe le hani. Ñéinbeiti aban arúeihani libe kóbüre, le lunbei lagumadihan lidan sun ubóu. Hérebei arúeihani le lunbei liabin lárigiñe kei gürabu. Lagumuhóun, ñeinbei aban arúeihani fánreinguati, ñeinbei fánreinti lídangiñe héreti kei gürabu ani ñeinbei fánreinti le méreti kei múa. Ánheinti dübü le asaliragubei wǘbüme, Larúeihan Bungiu le lunbei lagünrinchaguni sun le líbiri arúeihani ani laduraruba lun súnwandan”.

Aba labuluchagun Nabukodonosoru hudugua ligía ligibugiñe Danieli, lariñaga lun: “Bubungiute arufudubalin uénedü le bun. Úati Bungiu kei ligía”. Máfarun lumuti Nabukodonosoru Danieli hilagubei, lubaragiñe lira, aba líchuguni ábutime houn sun chu tau, iridaléi kei gumadimati Babilónia. Ariha bumuti óunaba lani Heowá lafurieidun Danieli?