Aban áriebu, ruti luénedü Nabukodonosoru saragu anufudei lun. Ábati lagúarun houn lánigu chu tau lun hariñaguni lun ka lan mini lubéi. Kei ua lubéi ni aban hádangiñe ariñaguti lun ka lan lílabei, aba layanuhan luma Danieli.

Lariñaga Nabukodonosoru lun Danieli: “Lidan nuénedü, arihatina aban tídibu wewe. Dan le laweiridunbei, chülüti liñun dagá sielu. Arihúati lídangiñe sun fulasu ubouagu. Gíbeti lin, buidu burí ligía lubana. Emeraaguatiña animaalugu lábugiñe lamuñadina, adüga hagía dunuru hamasa luagu lilimun. Rariti aban ánheli siélugiñe, aba lagúaragun: ‘Chaün huméi tídibu wewe luma burí lilimun. Hígireime lugudina luma lílagüle múarugu, gürañu lau gürabu luma kóbüre. Lerederuba kei animaalu áraabuna luagu sedü irumu. Subudi hamaamugei sun gürigia Bungiu lan Urúeibei luagu sun katei ani ru lani arúeihani lun le unti labusenra’”.

Ariñaga lumuti Heowá le mini lubéi uénedü ligía lun Danieli. Dan gunfuranda lubalin Danieli uénedü, aba labuinchun lau anufudei. Ábati lariñagun: “Urúei, hínsiñeti hamuga nun lun mama lan huagu lagunfulira huénedü, lun lagunfulirun hawagu háganiñu. Huguya tídibubei óunwenbu wewe le achaünrǘbei. Heferidirubei harúeihan, sagadiba heiga kei animaalu áraabuna. Ani kei ariñaga lan ánheli ligirúba lan lugudina luma lílagüle wewe múarugu, mini lan lira, lichugúayaba lan arúeihani hun”.

Aban irumu lárigiñe, dan le anihán lubéi Nabukodonosoru éibuga tábulugu luban, aríaguei lubuidun laríawagun Babilónia, aba lariñagun: “Ariha huméi lueirin lubuidun uburugu le nadügübei lun larihíniwa nuéirigun!”. Anihagua ayanuha dan le laganbunbei lariñagun aban umalali lun siélugiñe: “Nabukodonosoru! Gidawa arúeihani buéi”.

Ouraméme ligía, aba lálülüdün lau Nabukodonosoru, ábati lagumeserun óusera kei animaalu áraabuna. Sagawati lúbiñegiñe, ábati lawinwandun áraabu hama animaalugu. Aba lamiginagudun  lídiburi luma lúbara kamá tiyu luma túbara ágila.

Sedü irumu lárigiñe, aba lareidagun Nabukodonosoru, ábati ladügün Heowá lunya urúei lan Babilónia. Aba lariñagun Nabukodonosoru: “Alawaha numuti Heowá, Urúei le siélubei. Subudi naali guentó Heowá lan Urúeibei. Adügati lun hǘnabudun barügua tungua ani ru lumuti arúeihani lun le unti labusenra”.