Gaduhetu meha Isawéli aban nibureintu gíritu María, Galiléa meha tawinwanda lidan aban uburugu gíriti Nasarétü. Gadaradunhaaru meha María lun tamarieidun luma aban sarafangei gíriti Hosé. Dan le barüharu Isawéli sisi hati dageinañu, aba larufudagun ánheli Gabüriéli lungua tun María. Lariñaga tun: “Buiti binaafin, María. Wéiriti fulesei lánibu Heowá”. Kei ua lubéi gunfuranda tani María Gabüriéli, aba lariñagun tun: “Badageinadá, ábameti gasaani ban. Lunti bíchugun Hesusu luagu. Urúeibei ani laduraruba Larúeihan lun súnwandan”.

Tariñaga María lun: “Aban hiñaru to máfuridungiru nuguya. Ida lubati gasaani nan?”. Lariñaga Gabüriéli tun: “Úati ni kata lásiñarun Heowá adüga. Liábinba sífiri sandu buagun ani gasaanibadibu aban irahü. Dageinañoun giñe Isawéli to biduhe lau sun wéiyaaru lan”. Ábati tóunabun María: “Lidamun Heowá nuguya. Adügalá nau kei bariñaguni”.

 Ñǘdüntu María bisidoun Isawéli lidan aban uburugu le ligibuagubei burí wübü. Sanditu Isawéli lánhingichun irahü le turageirugubei dan taganbunbalin tabusurun María. Ábati tabuinchun lau sífiri sandu, aba tariñagun: “María, wéiriti labinirunibu Heowá. Madüna numuti tiabin lúguchu Nabureme bisidana núbiñe”. Tariñaga María: “Alawaha numuti Heowá tídangiñe sun nanigi”. Rédeitu María ǘrüwa hati tuma Isawéli, lárigiñe, aba tagiribudun túbiñoun uburugun Nasarétü.

Dan lasubudirunbalin Hosé dageinañoun lan María, aba mabusenrunhali lan lamarieidun tuma. Ligía larufudagunbei aban ánheli lungua lun lidan luénedü, lariñaga lun: “Manufudedabá bamarieidun tuma María. Madügüntu ni kata wuribati”. Ábati lamarieidun Hosé tuma María ani aba lanügünu lúbiñoun.