Dan laweiridunbei Huan, le lisaani Sakaríasi tau Isawéli, aba lánihali lan Heowá profeta. Óunaha lumuti awisaraña gürigia anite lan Mesíasi. Mídinti Huan arufudaha tidan burí haligilisin huríu o uburugu, lidan meha fulasu mageirawati lapurichiha. Ñǘdüntiña bandi gürigia aganbei Huan, dandu Herusaléngiñe kei Hudeagiñe. Ariñagati meha houn lun hebé lan hadügün katei burí wuribati gunda láamuga Bungiu hau. Gíbetiña asakürihatiña lídangiñe hafigoun, ábati labadiseiruniña Huan lidan duna Hordán.

Míbeti meha lílagu Huan. Lautu meha lura kameyu ladaüragun ani sírudu meha áraabuna hama chagagaru léigibaña. Busentiña meha gürigia hasubudirun bandi katei luagu Huan. Íbini fariséugu hama saduséugu, ha barüguabaña houngua, ñǘdüntiña arihei. Lariñaga Huan houn: “Mosu hasansiruni higaburi, asaküriha huguyame. Saminatün espechali humá ladüga hariñagun lirahüñü humá Abüraámü. Úati mini lan lira lirahüñü humá Bungiu”.

Ñǘdüntiña bandi gürigia arihei Huan, ábati hálügüdüni: “Ka lunbei wadügüni lun lagundaarun Bungiu wau?”. Lariñaga houn: “Anhein anuhein lubéi bián simisi huma, ru humá aban lun gürigia le úatu ni aban luma”. Subuditi bun ka lan uagu lariñagei lira houn? Ladüga meha busén lan hafurendeiruni mosu lan hínsiñe hamá ha híbiri gürigia houn lun lagundaarun Bungiu hau.

Ariñagati giñe houn aguburahatiña liseinsuna gumadi: “Harumalá hibagari, meyeeda humá ni aban”. Ánheinti houn súdaragu, ariñagati: “Mánhara humá lun seinsu o amu katei le ichugúti hun lun hadügün wuribani lun gürigia madurunti, mariñagun huguyame iyeeni”.

 Ñǘdüntiña giñe fádirigu hama lewitagu arihei Huan, ábati hálügüdüni: “Kátabu san? Busentiña gürigia hasubudiruni”. Lariñaga Huan houn: “Au ábanbei umalali lidan fulasu mageirawati, le adundehabaliña gürigia lumoun Heowá, ítara kei lariñaguni Isaíasi lidan profesía”.

Gúndaatiña meha gürigia lau le larufudahabei Huan houn. Ani gíbetiña meha hádangiñe busentiña hasubudiruni anhein ligía lubéi Mesiasibei. Ligía lariñagunbei houn: “Gabafutimati le anitebei nárigiñe nuéi. Madünatina ni lun nafaragaduni tagürüga ligeidin. Lau duna nabadiseiha, anhein ligía lauba sífiri sandu labadiseiha”.