Óunaha lumutiña Augustu Sésarü, le lurúeite Roma, sun huríu ha lábugiñebaña lagumadihan abürüdǘwa hageira. Kei meha belenna lubéi liduheñu Hosé ligía lídinbei tuma María abürüdǘwa ñein. Chülümémeeli meha dan lun gasaani tani María Hesusu.

Dan hachülürünbei Belén, madaritiña amu fulasu lun herederun ñein luéidigia tidan aban muna to ñein lubéi hareidahóua ibiñanigu. Ñein nasirua lan Hesusu. Aba tóuburaguni tau gamisa ñulutu, róungüdatei lau góunigi lidan héigagüle ibiñanigu.

Lidan aban áraabu yarafa lun Belén, añahein meha fiu wügüriña óunigiraña halügüniña mudún guñoun. Sódini, aba larufudagun aban lani Bungiu ánheli lungua houn, ámiriha ligía luéirigun Heowá geyegu hau. Ábati hanufudedagun, ligía lariñagunbei ánheli houn: “Manufudeda humá. Nanügüña uganu buiti hun. Nasiruaali Mesíasi uguñe Belén”. Ouraméme ligía, aba harihíniwa bandi ánheligu sielu,  ha ariñagubaña: “Uéiriguni lun Bungiu sielu, darangilaü houn gürigia ubouagu”. Lárigiñe, aba marihúaaña lan ánheligu. Kati hadügübei hóuniri mudún?

Ariñagatiña hóuniri mudún hóuniwagua: “Keimoun Belén reiti guentó”. Ñǘdüntiña furesegueina, ábati hadariruni Hosé tuma María lau haráü le figigilibei tidan muna to ñein lubéi hareidahóua ibiñanigu.

Aba taweiridun hanigi sun ha aganbubalin le lariñagubei ánheli houn hóuniri mudún. Huliliti tasaminarun María luagun sun le lariñagubei ánheli ani mabulieidun tumuti. Giributiña wügüriña hagía óunigiraña halügüniña mudún íchigeina seremei lun Heowá luagu sun le harihibei luma le haganbubei.