Iyereeguti meha Hesusu houn fariséugu, ligía busén habéi meha hadarirun lidurun lun hádaruni furisunrugun. Ariñagatiña moun lumuti lan lareidaguagüdün sánditiña lidan luéyuri emeraaguni. Aban weyu, lidan luéyuri emeraaguni, dúnguati Hesusu luma aban marihinti amuriaha ǘmadarugu. Lariñaga houn lani disipulugu: “Ariha huméi ida luba lan layusuruni Bungiu lubafu lun líderaguni wügüri le”. Aba ladügün murusun múa lau larüre lun líchuguni luagu lagu wügüri ligía. Lariñaga lun: “Beiba achibei bagu lidan duna le gíribei Siloé”. Ábati ladügüni wügüri ligía le lariñagubei Hesusu lun, aba gayaraahali lan larihin luagu furumiñeti wéiyaasu lidan libagari.

Aba taweiridun hanigi gürigia. Hariñaga: “Ma anihán meha wügüri le añuurubei amuriaha? O aban lenege?”. Lariñaga wügüri ligía houn: “Marihinga nasirua nan!”. Ábati hálügüdüni: “Ka uagu arihaadibu lubéi?”. Dan le lariñagunbalin le asuseredubei houn, aba hanügüni houn fariséugu.

Ábati lariñagun wügüri ligía houn fariséugu: “Ruti Hesusu murusun múa luagu nagu ariñaga ligía nun lun nidin achibei. Ligía nadügübei, guentoti, arihaadina”. Hariñaga fariséugu lun: “Anhein areidaguagüda lubéi Hesusu lidan luéyuri emeraaguni, mama lúmagiñe Bungiu liabin lubafu”. Hariñaga ha híbiri: “Lun hamuga mama lan lúmagiñe Bungiu liabin lubafu siñabei hamuga lareidaguagüdün”.

Aba hagúarun fariséugu houn  lagübürigu wügüri ligía, ábati hálügüdüniña: “Ida liñati arihaali lubéi hisaani guentó?”. Hanufudetiña meha lagübürigu wügüri ligía ladüga ariñagaaña lan fariséugu furumiñeguarügü lan le íchuguti lafiñen luagu Hesusu labugúba lan tídangiñe haligilisin huríu. Ligía hariñagunbei: “Ibidiñeti woun. Álügüda huméi!”. Sigitiña fariséugu álügüdaguei wügüri ligía darí lun lariñagun: “Ariñaga naali sun le nasubudirubei hun. Ka uagu hasigira álügüdaguana?”. Aba hagañidun fariséugu, ábati habuguni.

Ñǘdünti Hesusu adunragua luma wügüri ligía, lariñaga lun: “Afiñetibu san luagu Mesíasi?”. Lariñaga wügüri ligía: “Lun hamuga subudi nani nafiñeruña hamuga luagu”. Lariñaga Hesusu lun: “Au Mesiasibei”. Wéiriti lubuidun lóuseruni Hesusu wügüri le, adián? Areidaguagüda lumuti ani íderagua lumuti lun lafiñerun.