Gabafuti meha Hesusu lun ladügün lun hareidagun sánditiña luma lun lásaaragüdün hilaaña. Gayaraati meha giñe lagumadiruni garabali luma huya. Aban weyu, lárigiñe lafurieidun Hesusu luagu wübü, aba larihin dagá lan aban luriban dan lidan duna Galiléa. Énheunheina haña meha lani apostolugu tidan hagune lau sun here lubaroun garabali. Ligía lararirunbei Hesusu lun lidin tuagun hagune éibugeina ligibuagu duna. Dan harihinbei apostolugu léibuguña lan ligibuagu duna, aba habuinchun lau anufudei. Ligía lariñagunbei Hesusu houn: “Manufudeda humá. Au le”.

Lariñaga Féduru lun: “Nabureme, anhein buguya lubéi, adügabá giñe lun néibugun ligibuagu duna chülǘ le ñein bubéi”. Lariñaga Hesusu lun: “Higabu”. Aba lararirun Féduru tídangiñe ugunei, ábati lidin luagun Hesusu éibugeina ligibuagu duna. Dan layarafadúnbei Féduru lun Hesusu, aba larihin luagun luriban dan, ábati ladagarun anufudei luagu. Dan lasandirunbei Féduru labuluchuña lan, aba lagúaragun: “Sefu bana, Nabureme!”. Aba lárügüdüni Hesusu lúhabu, lariñaga lun: “Ka uagu basandira machouruni? Hagéi san bafiñen?”.

Kei ládinun Hesusu luma Féduru tidoun ugunei, aba lagalumadun luriban dan. Ida liña funa san hasandiragun apostolugu houngua? Ariñagatiña: “Inarüni Lisaani lan Bungiu buguya”.

Mámarügüñein lidan weyu ligía larufudei Hesusu gabafu lan luagu ligaburi dan. Amu weyu, dan le lídiña lan Hesusu hama lani apostolugu luagun le aban oubaü libiti barana, aba lidin arumuga tanagangiñoun ugunei. Ligía ladagarun aban óunwenbu liñawan dan. Aba lagumeserun duna ebeluha tidoun hagune, ábati tabuinchun lau duna. Aba hagagudahani apostolugu Hesusu lau hagúaragun lun: “Máisturu, wóunwegua! Íderaguabawa!”. Aba lásaarun Hesusu, lariñaga lun barana: “Maniba!”. Ouraméme ligía, aba lagalumadun garabali luma barana. Ábati lálügüdüniña Hesusu apostolugu: “Féridi humaali san hafiñen?”. Hariñaga hámagua: “Íbini garabali luma barana gaganbaditiña lun”. Aba híchugun apostolugu fe moun lumuti lan hanufudedun luéi ni kata ánhaña afiñera luagu Hesusu sunsuinagubei.