Lárigiñebei labadiseirun Hesusu, aba lanügüni sífiri sandu lidoun fulasu mageirawati. Méiginti ni kata luagu 40 weyu, ligía weiri lubéi lilama. Ábati liabin Mafia óuchaguei, lariñaga lun: “Anhein inarüni lubéi Liráü ban Bungiu, ariñagabá lun burí dübü le lun lasaliragun feinme”. Óunaba lumuti Hesusu Mafia lau líriduni le tariñagubei Lererun Bungiu lun, lariñaga: “Bürüwañu liña mámarügüñein lan éigini wemegeira lun wawinwandun. Mégeitiwa giñe waganbuni sun le lariñagubei Heowá”.

Lárigiñe, aba lariñagun Mafia lun Hesusu: “Anhein Liráü bubéi Bungiu, chubaba luéigiñe fulasu le íñutimabei tun ténpulu. Lugundun bürüwañu liña lóunahabaña lan Bungiu lani ánheligu lun hesefurunibu”. Ábaya líriduni Hesusu le tariñagubei Lererun Bungiu lun, lariñaga: “Bürüwañu liña moun lumuti lan wóuchaguni Heowá”.

Lagumuhóun, arufuda lumuti Satanási sun arúeihani le ubouagubei lun Hesusu lau sun lirisin luma luéirigun, lariñaga lun: “Níchugubei sun arúeihani le bun luma burí luéirigun ánhabu áhuduragua nun ábanrügü wéiyaasu”. Ábati lóunabuni Hesusu: “Disebá nuéi, Satanási! Bürüwañu liña lúnrügüba lan Heowá wáhuduragua”.

Aba lidin Mafia, ábati hayabin ánheligu íchiga leigin Hesusu. Lúmagiñe dan ligía, aba lagumeserun Hesusu apurichihei uganu buiti luáguti Larúeihan Bungiu. Lun meha ladügüni wadagimanu lira lounahóua ubouagun. Wéiriti meha hagundan gürigia lau le larufudahabei Hesusu houn ani ñǘdüntiña lárigi le ñeinhin lumuti lidin.