Lárigiñe lanúadiruniña Hesusu 12 lani apostolugu, aba lararirun luéigiñe wübü lidoun fulasu le ñein lubéi hóundaragua bandi gürigia. Ñǘbuintiña Galiléagiñe, Hudeagiñe, Tírugiñe, Sidongiñe, Síriagiñe luma luéigiñe le aban oubaü libiti duna Hordán. Barüina haña meha gürigia sánditiña hámagua hama ha gawagutiña sífirigu wuribatiña, areidaguagüda lumutiña Hesusu súngubei. Ábati lañuurun lóubawagu wübü ani arufudahati houn. Ariñaga lumuti ka lan lunbei wadügüni anhein busén wabéi lumadagu wamá Bungiu. Ariñagati mosu lan gabaroun wamani megei wamani ladundehan Heowá, áfaagua wagíame lun línsiñedun woun. Ani siñá lan línsiñedun Bungiu woun anhein mínsiñe habéi ha híbiri gürigia woun. Mosu buidu lan wóuseruniña sun gürigia, íbini wáganiñu.

Ariñagati Hesusu: “Úati buídurügü lan hínsiñe hamá bumadagu bun, mosu giñe hínsiñe hamá báganiñu bun, feruduna báñame tídangiñe sun banigi. Ánheinti agañida somu gürigia buma, beiba amuriaha ferudun  luma lau lóufudagun. Óuserabaña ha híbiri kei babusenrun bouserúniwa”.

Ruti giñe Hesusu adundehani buiti luagu katei burí le wámabei. Ariñagati: “Buítimati gamadagua ban luma Heowá sügǘ lau gama ban bandi seinsu. Gayaraabei líweruhoun biseinsun, ánheinti bumadagua luma Heowá, siñabei líweruhoun buéi. Ligíati, madiheridabá luagu kaba lan beiga, bata o badaüra. Arihabáña dunuru. Óunigira lumutiña Bungiu súnwandan lun hadariruni heigin. Madügünbei badiheridun saragu lun migifetima lan bibagari. Haritaguabéi subudi lani Heowá ka lan bemegeirubei”.

Maganbungiña meha gürigia amu adimureha kei ladügüni Hesusu. Marufudahan hamagili meha lábutigu relihión lira houn. Ka meha uagu buidu lubéi larufudahan Hesusu? Ladüga lúmagiñe lan meha Heowá liabin sun le larufudahabei.