Dan le meha tídanñein lubéi rumu íñutu Hesusu hama lani apostolugu, ariñagati houn: “Hígirubadina súngubei huguya guñoun le”. Lariñaga Féduru: “Gayaraabei hígirunibu sun ha, anhein au, mígirun nubadibu”. Ábati lariñagun Hesusu lun: “Lubaragiñe layuguruhan gayu, ariñagaadibume ǘrüwa wéiyaasu ibidiñe nan bun”.

Anurahatiña hiibe-agei apostolugu dan le hárügüdünbalin súdaragu Hesusu lun hanügüni lúbiñoun Gáifasi. Ñǘdüntiña bián hádangiñe hárigi hárigi gürigia hagía. Féduru, aban hádangiñe. Aba lebelurun lidoun tibürürün luban Gáifasi, ábati lidin abacharagua yarafa lun watu gemeti le ñeinbei. Adügati ligemeri watu lun tarihini aban musu nibureingiru ligibu Féduru, ábati tariñagun: “Subudi numutibu! Lúmañadibu buga Hesusu!”.

Lariñaga Féduru: “Uá, mítaranti! Ibidiñeti nun ka lan uagu bayanuha!”. Ábati layarafadun lun bena. Ábayati tarihini aban musu nibureingiru, aba tariñagun houn ha ñéinbaña: “Lúmañein buga Hesusu eyeri le!”. Lariñaga Féduru: “Ibidiñegubeiti nun ka lan Hesusubei!”. Aba lariñagun aban wügüri: “Buguya aban hádangiñe! Arihúati luagu ligaburi bayanuhan Galiléana lan buguya, kei Hesusu”. Aba láfiñurun Féduru: “Ibidiñeti nun!”.

Ouraméme ligía, aba layuguruhan aban gayu. Ariha lumuti Féduru ladigiragun Hesusu ariha luagun. Aba laritaguni le lariñagubei Hesusu, ábati láfuridun ñéingiñe aba layahun lau igarigu.

Sunti dan ligía, óundaraguatiña liñun-agei lúrudu lúbiñe Gáifasi lun hasiadiruni Hesusu. Desidírühaña meha háfaruni hilagubei ligía háluahanbei lidurun lun hadügüni. Íbini áluaha hamá lidurun, madaritiña. Ábati lálügüdüni Gáifasi Hesusu: “Lisaani san Bungiu buguya?”. Lariñaga Hesusu lun: “Ítara liña”. Aba lariñagun Gáifasi: “Memegeiruntiwa waganbun amu katei. Anaba laali wügüri le Bungiu!”. Ábati hariñagun lílana liñun-agei lúrudu: “Mosu lounwen”. Suegua hamuti Hesusu, agayuaha hagía luagu ligibu, daruguatiña lau lagu,  bulesei haméi, ariñageina: “Anhein profeta bubéi, ariñagabéi woun ka lan agayuahabei buagu!”.

Dan le larugadunbei, aba hanügüni Hesusu ligibugiñoun liñun-agei lúrudu, ábaya hálügüdüni: “Lisaani san Bungiu buguya?”. Aba lóunabun Hesusu: “Huguya guánarügü ariñagubei Lisaani lan Bungiu au”. Aba hariñagun anaba laali lan Bungiu, ábati hanügüni lúbiñoun gumadimati rómana le gíribei Ponsiu Pilatu. Ka asuseredubei lárigiñe? Warihaali.