Dan lárigiñe larufudagun Hesusu lungua houn apostolugu, aba lidin Féduru eseniha lidan duna Galiléa. Ñǘdünti Tomasi, Santiagu, Huan hama amu disipulugu luma. Sun áriebu hau eseniha mañugunga ni kata.

Larugan, aba harihin aban wügüri rara béyabu. Aba lagúarun houn, lariñaga: “Mañugungidün san?”. Hariñaga lun: “Uá”. Ábati lariñagun houn: “Chü humóun hisenin luéigiñe tóunwenren ugunei”. Lárigiñe hachüürünu, aba tabuinchun seni hau úduraü darí lun siñá lan hádinagüdünu tidoun ugunei. Sódini, aba lasubudiruni Huan Hesusu lan wügüri ligía, ábati lariñagun: “Aburemei lira!”. Lau lóufudagun, aba lachubarun Féduru dúnarugun, ábati láfulihan larun beya. Aba houdin ha híbiri disipulugu lárigi tidan ugunei.

Dan hachülürünbei larun beya, arihatiña úduraü tuma fein éfeda ligibuagu watu gemeti. Ariñagati Hesusu houn lun hanügün hádangiñe  úduraü ha hadigibaña lun lun lásürahaniña. Lárigiñe, aba lariñagun houn: “Higougu, hou humaamuga”.

Dan lásurunbei heigin, aba lálügüdüni Hesusu Féduru: “Hínsiñetina san bun sügǘ lau hínsiñe úduraü ha bun?”. Aba lariñagun Féduru: “Anha, Nabureme, subuditi bun hínsiñe ban nun”. Lariñaga Hesusu lun: “Ruba heigin nánigu”. Ábaya lálügüdahan Hesusu: “Hínsiñetina san bun, Féduru?”. Lariñaga Féduru: “Nabureme, subudi bumuti hínsiñe ban nun”. Lariñaga Hesusu lun: “Tenibá houn nánigu”. Álügüda lumuti Hesusu Féduru luagu ligiaméme luagu lǘrüwan wéiyaasu. Ábati lírudagun Féduru, lariñaga lun: “Nabureme, subuditi sun katei bun. Subuditi bumuti hínsiñe ban nun”. Lariñaga Hesusu lun: “Góunigibaña nánigu”. Ariñagati giñe lun: “Sigiba afalarana”.