Füramaseti Heowá: “Úaalime ayahuni, igarigu, sandi ni óunweni. Naragahabei sun águiraü. Maritagun humaalime katei burí wuribati le susereelibei”.

Ru lumuti Heowá Adán tuma Ewa lidan fuluri-agei Edén lun hawinwandun lau ugundani luma darangilaü. Mosu meha háhuduragun lun Háguchi le siélubei, gasaanigu hagíame bandi irahüñü lun labuinchun ubóu. Lau sun meha maganbadi lan Adán tuma Ewa lun Heowá, masansirunti le labusenrubei ladügün. Tidan líburu to, ariha wamaali súnwandan lan lagunfuliruni Bungiu le füramase lubéi. Ítara kei meha füramase lani Heowá lun Abüraámü, lanügüba Larúeihan Bungiu lubuidun burí abiniruni ubouagun.

Yarafa madise úaalime Satanási ni lumafianu ni gürigia wuribatiña. Háhuduraguba sun gürigia lun Heowá. Masandirunbadiwa, móunwegun wagíame. Lubaragiñe lira, wásaaruba sagü weyu buin lau erei, gúndaañu lau wabagari. Paraísu halime ubóu. Ñeinbei éigini semeeti houn sun  gürigia tuma tubuidun burí muna. Úabaña gürigia wuribatiña ni hanarimetiña, buídubaña súngubei. Manufudebaña animaalugu áraabuna wawéi, ni wagía hawéi.

Taweiriduba wanigi danme lagumeserun Heowá ásaaragüdaña hilaaña. Wíchuguba buiti achülürüni houn gürigia ha meha awinwandubaña lidan binadu dan, kéiburi Aweli, Noé, Abüraámü, Sara, Moisesi, Rudu, Esütérü luma Dawidi. Híderagubadiwa adügei ubóu ábanme paraísu. Súnwandan ñeinbei lan katei buiti lun wadügüni.

Busenti Heowá lun bawinwandun lidan Paraísu. Ñein, bafurendeiruba bandi katei luagu Bungiu le masaminarun bágili gayara lan bafurendeiruni. Ligíati, yarafatima wamá sagü weyu lun Heowá guentó luma lun súnwandan!