Lárigiñebei láfuridun Adán tuma Ewa lídangiñe fuluri-agei Edén, aba gasaanigu hamá saragu. Kaín líribei furumiñeti. Ábunagua meha nadü luadigimaribei. Aweli líribei libiaman, óunigira meha mudún luadigimaribei.

Aban weyu, aba ladügün Kaín luma Aweli adagaragüdüni lun Heowá. Subuditi bun ka lan adagaragüdünibei? Aban luwuyeri idewesei espechaliti le ichugúbei lun Bungiu. Gúndaati Heowá lau ladagaragüdün Aweli, anhein lau ladagaragüdün Kaín, magundanti. Ligía lagañidunbei Kaín saragu, ábati lariñagun Heowá lun: “Ánhabu asigira gáñiñu, badügüba somu katei wuribati”. Madügünti Kaín gasu lau.

 Aba lariñagun Kaín lun Aweli: “Keimoun áraabu”. Dan le ñéinhaña hábuguarügü, aba lachubarun Kaín luagun lamulen, ábati láfaruni hilagubei. Kati ladügübei Heowá? Bei lumuti Heowá Kaín lau lóunahani dise hawéi liduheñu. Siñaali meha lagiribudun.

Ka larufudahabei le woun? Gayara lan wagañidun dan le masali lan katei woun kei wabusenruni. Ánhawati asandira laweiriduña lan wagañi o harihini amu gáñihadiwa lan, mosu wagalumadun lau lóufudagun. Anhein madügün wamá, ladügüba wagañi lun wadügün somu katei wuribati.

Wéiriti meha línsiñe Heowá lun Aweli ani óuserati meha buidu, ligía mabulieidun lubalin Heowá. Ladügüba lunya labagaridun danme le paraísuhali ubóu.