Füramaseti Moisesi lun faraón málugun haali lan lagiribudun arihei. Lubaragiñeti lidin, ariñagati lun: “Danme amidihali áriebu, lóunweba isaani le ígiramaü —o íbugañaü— hadan kada iduheñu ehiptuna, dandu lisaani faraón kei furumiñeti hasaani lidamun”.

Ariñagati Heowá houn ísüraelina: “Aranse humá aban éigini espechaliti. Áfara humá aban wügüri mudún o aban liraüraü gábara le ábanti irumu lau, ábameti háhurudagun murusun lídangiñe lita luagu lumarukun tubenari muna. Ásüraha huméi lǘgürügü, ábameti héigini tau fein to maganatu lébini. Sánsiguñu humá, aranseñu lubá wéiyaasu, daüñu humounme higeidin. Nesefuraadün áriebu to”. Ma funa lueirin hagundan ísüraelina, adián?

Dan le amidihali áriebu, ñǘdünti lani Heowá ánheli tidan sun muna Ehiptu. Hilati ígiramaü le tídanbei sun muna to úabei makü lánina hitaü luagu tubenari. Ánheinti tidan muna to máküwaboun lau hitaü, madügünti ánheli ni kata houn isaanigu. Hilati aban isaani hadan sun iduheñu ehiptuna, dandu rísitiña kei gudemetiña. Ánheinti hadan ísüraelina, úati ni aban isaani óunweti.

Hilati giñe lígirama faraón. Aba lásiñaruni faraón katei le awanda,  ábati lariñagun lun Moisesi luma lun Aarón: “Heiba yáagiñe! Heiba áhuduragua lun Hubungiute! Barǘ humaña hibiñanigu, heiba!”.

Fulenu hati áriebu ligía. Afileiheina háfurida ísüraelina Ehiptugiñe aban türibu lárigi aban, tílana aban muna tárigi aban. Sisi-sánñanu-milu wügüriña áfuridutiña, hámaya bandi würiña hama irahüñü. Ñǘdüntiña giñe bandi gürigia ha mama ísüraelina úara hama lun háhuduragun lun Heowá. Mámaaña meha idamuni ísüraelina!

Lun mabulieidun hamani sefu lániña Heowá, mosu meha hadügüni ligiaméme éigini espechaliti sagü irumu. Luéyuri Esefuruni liña hagúarun lun.