Lidan meha aban fulasu gíriti Usu lawinwanda aban wügüri le huduguati lun Heowá. Hobu meha líribei, wéiriti meha lirisin ani gíbetiña meha liduheñu. Aban meha gürigia buiti ligía, íderagua lumutiña meha gudemetiña, würiña ha hilaali hani weiriei hama irahüñü ha máguchihaaña máguchu. Afiñetibu san maturóbulin lan meha Hobu ladüga aban lan gürigia buiti ligía?

Íbini meha ibidiñe lan lun Hobu, líchuguñein meha Mafia larihin luagun. Aba lariñagun Heowá lun Satanási: “Ariha baali san Hobu le nubúein? Úati ni aban kei ligía ubouagu, gaganbaditi, buidu ligía lóuserun”. Ábati lóunabuni Satanási: “Anha, gaganbaditi bun ladüga góunigi bani, biní bumuti, rútibu múa hama ibiñanigu lun... Gidabei san sun le lúmabei luéi, ábame máhuduragunhali lan bun”. Aba lariñagun Heowá lun: “Adügabá lun larihíniwa anhein binarün lubéi, íbini ítara, míchutina üma bun lun báfaruni”. Ígirati Heowá lun lóuchaguni Satanási Hobu, subuditi bun ka lan uagu? Ladüga chouru lani Heowá lasigiruba lan Hobu lau laganbadi lun.

Adügati Satanási saragu katei wuribati lun Hobu lun lóuchaguni. Furumiñe, yusu lumutiña gürigia ha únbaña hagúara sabeugu lun híweruhaniña lilügüniña bágasu hama burigü. Lárigiñe, aba láguduniña sun lilügüniña mudún. Ñǘbuintiña gürigia ha únbaña hagúara kalüdéana íweruhaña lilügüniña kameyu. Hilatiña giñe lubúeingu Hobu ha óunigirubaliña animaalugu ha. Leti gáritimabei lun: hilagua hamá sun lisaanigu dan le téiguadunbei muna to ñein habéi hawagun. Ábati lírudun Hobu saragu, íbini ítara, sigiti áhuduragua lun Heowá.

Busenti meha Satanási lun lasigirun Hobu asufurira,  ligía ladügünbei lun lasaliragun guméi luagu sun lúgubu. Wéiriti meha ligari guméi ligía. Ibidiñeti meha lun ka lan uagu lasusereda katei burí wuribati le lun, íbini ítara, sigiti áhuduragua lun Heowá. Gúndaati Bungiu dan le larihinbalin le ladügübei Hobu.

Lárigiñe, aba lóunahan Satanási ǘrüwa wügüriña óuchaguei Hobu. Ariñagatiña lun: “Chóuruti afigouhaadibu lan ani maní biña lau. Ligía labeichunbalibu Bungiu”. Aba lóunabuniña Hobu: “Madügüngidina ni kata wuribati”. Lárigiñe lira, aba lagumeserun asaminara Heowá lan adügübei lun liábingua sun turobuli ligía lun, ábati lariñagun óusera laali lan Bungiu lau marichaü.

Laganbahañein meha aban nibureinti gíriti Eliú sun le ariñawagúbei mariñagunga ni kata. Danti le desidírü lubéi layanuhan, aba lariñagun: “Habulieidaguña sun huguya. Wéiriti lubuidun Heowá sügǘ lau wasaminaruni, maweiyasunbei adüga ni kata wuribati. Ariha lumuti sun katei ani íderagua lumutiña gürigia dan gaturóbulin hamá”.

Ayanuhati giñe Heowá luma Hobu. Álügüda lumuti: “Haliañadibu meha dan le nadügünbalin sielu luma ubóu? Ka uagu basaminara óusera nan lau marichaü? Ayanuhatibu ibidiñega bun ka lan uagu lasusereda katei”. Ánhati Hobu lun lichara, ábati lariñagun: “Bulieiguaadina. Ferudunabéi le nariñagubei. Aganbaadina meha buagu, ánheinti guentó, subudi náadibu buidu. Ariha naali gayara bani sun katei”.

Dan le lásurunbei lóuchawagun Hobu, aba ladügün Heowá lun lareidagun Hobu ru ligía lóugiñe sun katei le meha lúmabei lun. Migifeti meha libagari Hobu ani gúndaati. Biní lumuti Heowá ladüga gaganbadi lan, lau sun meha anihein lan dan hénrengu lan. Ítara buba san kei Hobu lau báhuduragun lun Heowá súnwandan meberesenga le asusereduti?