Sun aniha lan Hosé furisunrugu, aba gewenedü lan faraón, le lurúeite Ehiptu, fiu uénedü le úati kaba lan afuranguagüdei lun. Aba lariñagun aban hádangiñe lubúeingu faraón lun gayara lan lafuranguagüdüni Hosé lun ka lan mini lubéi luénedü. Lau lufuresen, aba lóunaagüdün faraón luagu Hosé.

Aba lálügüdüni faraón: “Gayaraati san bariñaguni nun ka lan mini lubéi nuénedü?”. Ábati lóunabuni Hosé: “Ñeinbei saragu éigini Ehiptu luagu sedü irumu, lárigiñe, ñeinbei sedü irumu lau ilamaü. Anuadirabá aban gürigia le chuti lau lun lareidahan éigini mounwen hamaamuga gürigia halama”. Ábati lariñagun faraón lun: “Anúadira numutibu! Buguyaba gürigia wéirigutima Ehiptu nárigiñe”. Ida liña meha lasubudiruni Hosé le mini lubéi luénedü faraón? Heowá íderagubalin.

Areidati Hosé saragu éigini lidan furumiñeti sedü irumu. Lárigiñe, aba ñein lan ilamaü lidan sun fulasu, kei lariñaguni Hosé, ábati hachülürün gürigia lídangiñe sun fulasu agañeiha éigini luma. Aba líchugun Hakobu, le lúguchi, fe anihein lan éigini Ehiptu, ligíati lóunahanbei diisi hádangiñe lisaanigu agañeiha ñein.

Aba houdin lisaanigu Hakobu lumoun Hosé, rúgubeiti Hosé fe líbugañanu lan. Ánheinti hagía masubudirun hamuti. Aba habuluchagun ligibugiñe Hosé, kei meha larihini lidan luénedü dan meha nibureingili. Busenti meha lasubudiruni anhein iyereegugili lubéi houn, ligía lariñagunbei houn: “Hiábiña aríaahei ka lan louba fulasu débilibei”. Ábati hóunabun: “Mama aríaahatiña fulasu wagía! Kanán waganawa, dúusuñadiwa meha íbirigu. Hilá aban, ánheinti le  agumuhóuni, rédeiha buga luma wáguchi”. Aba lariñagun Hosé houn: “Barǘ huméi hamulen le agumuhóuni nun afiñe náamuga hun”. Ábati hagiribudun lúbiñoun háguchi.

Ábaya herederun liduheñu Hakobu méiginga, ábayati lóunahaniña lisaanigu agañeiha Ehiptu. Ánheinti guentó, ñǘdünti Benhamín, hamulen le agumuhóuni hama. Lun larihini Hosé anhein sánsihaña lubéi líbugañanu, aba laramuduni luerun le pülata tidan lisagüte Benhamín, ábati líridahani luagu ligía lan íweruhabalin. Dan le hadarirunbalin lubúeingu Hosé weru tidan lisagüte Benhamín, siñá hamuti líbugañanu afiñera. Aba hayumuragun lun Hosé lun hagía lan labeicha leweñegua Benhamín.

Ñein larihei Hosé sánsihaña lan líbugañanu. Aba lásiñaruni Hosé awanda, aba lagumeserun ayahuaha, ábati lariñagun houn: “Hosé au, le híbiri. Wínwangili san núguchi?”. Aba taweiridun hanigi líbugañanu Hosé. Lariñaga houn: “Masandiragua humá hungua wuriba luagu le hadügübei. Bungiu anügübalina ñahoun lun nesefuruni hibagari. Heiba furese anügei núguchi”.

Aba houdin líbirigu Hosé lau lubuidun ñunsu le lun háguchi luma lun hanügüni Ehiptun. Ábaya ladunragun Hosé luma lúguchi lárigiñe saragu irumu maríagunga houngua.