Bián-weinñein irumu lau Moisesi awinwanda Madián. Ñein lamarieida gasaanigu ligía. Aban weyu, lidan lóunigiruñanu lan lilügüniña mudún yarafa lun wübü Sinaí, aba larihin aban katei le ámuti. Watu gemeti lidan aban búbugati, ani mágudunti! Dan le layarafadúnbei Moisesi lun larihini ka lan asuseredubei, aba laganbun aban umalali lídangiñe búbugati le ariñagubei: “Moisesi! Mayarafadabá ñahoun. Ragaboun bigeidin ladüga sánduti fulasu le ñein bubéi”. Heowá ayusurubei aban ánheli lun layanuhan luma Moisesi.

Aba lanufudedun Moisesi ligía ladouragunbei lau ligibu. Ariñagati Bungiu lun: “Ariha naali hasufuriruña lan ísüraelina saragu. Nesefuraaña lídangiñe habafu Ehiptuna, ábame nanügüniña lidoun aban fulasu le buiti. Buguyaba asagaraña numutuniña Ehiptugiñe”. Adügati funa san lira lun taweiridun lanigi Moisesi?

Aba lálügüdahan Moisesi: “Kábati nariñaga houn gürigia danme le hálügüdünina ka lan óunahabalina?”. Lariñagati Bungiu lun: “Bariñagame houn, Heowá, le Lubungiute Abüraámü, Isaakü luma Hakobu óunahabalina”. Ábati lariñagun Moisesi: “Ánhañati mafiñe gürigia nun?”. Aba larufuduni Heowá lun líderagubei lan. Ariñagati lun Moisesi lun láguruni lubadun múarugun, ábati lasaliragun badun héweme. Lárigiñe, aba lárügüdünu Moisesi hewe tuguya luéigiñe tili, ábaya tasaliragun bádunme. Ábati lariñagun Heowá lun: “Danme le badügüni milaguru le, barufudubei Au lan óunahabalibu”.

Gama lumoun, aba lariñagun Moisesi: “Mariñagaditinatia buidu”. Aba füramase lan Heowá lun: “Nariñagubei bun kaba lan bariñaga, ani nóunahabei Aarón le bíbugaña buma lun líderagunibu”. Kei lasubudiruni Moisesi líderagubei lan Heowá, aba lagiribudun Ehiptun, barǘ lumutu lani weiriou hama lisaanigu lúmagua.