Aba hígiruni ísüraelina wübü Sinaí. Aweiyasuhatiña luéigiñe fulasu mageirawati Parán darí hachülürün lidoun fulasu le gíribei Kadesi. Ñein lariñaga Heowá lun Moisesi: “Óunahaba 12 wügüriña, aban lídangiñe kada türibu, arihei ida liña lan lumúan Kanán le lunbei níchuguni houn ísüraelina”. Aba lanúadirun Moisesi 12 wügüriña, lariñaga houn: “Heiba Kanán, ariha humaamugei anhein buidu lubéi múa lun ábunaguni, anhein here habéi o mere hamá gürigia ha ñéinbaña, anhein tidan lubéi kianpu-agei hawinwanda o lidan burí uburugu”. Ñǘdüntiña dúusugubei aríaahei fulasu Kanán. Hosué luma Kalebü haganagua.

Giributiña aríaahatiña 40 weyu lárigiñe, barüina igu, güranáda tuma beibei. Ábati hariñagun: “Buiti múa le ñeinbei, ánhañati gürigia ha ñéinbaña héretiña ani íñuburiti lubarieirun uburugu”. Lariñaga Kalebü: “Keimoun! Gayaraabei wagañeiruniña!”. Subuditi bun ka lan uagu lariñagei Kalebü lira? Ladüga afiñe lan Kalebü luma Hosué luagu Heowá. Ánhañati ha híbiri 10 aríaahatiña ariñagatiña: “Uá! Wéinamutiña gürigia ha ñéinbaña kei hígandei! Aban liñüraü warihíniwa hóubagiñe kamá chagagaru”.

Aba heferidiruni ísüraelina haguraasun. Ábati hagumeserun ekehara, ariñaga hagía hámagua: “Anúadira wamá amu alidihati giribu wamaamuga Ehiptun! Kaba uagu woudin ñeinhin lun háfaruniwa  hilagubei?”. Aba lariñagun Hosué luma Kalebü: “Manufudeda humá, gaganbadi humá lun Heowá. Lóunigirubadiwa”. Madügüntiña ísüraelina gasu hau. Busenrügütiña háfaruni Hosué luma Kalebü hilagubei.

Kati ladügübei Heowá? Aba lariñagun lun Moisesi: “Lau sun adügaadina lan saragu katei buiti hawagu ísüraelina..., añahagua lau maganbadi hamá. Nígiraaña lidan fulasu mageirawati luagu 40 irumu, ñeinba hóunwegua. Hosuerügübei, Kalebü hama hasaanigu ísüraelina awinwanda lidan fulasu le füramase nubéi houn”.