Dan lárigiñe, sun añahagua lan ísüraelina lidan fulasu mageirawati, aba liñuragun Koré, Datán, Abirán hámaya 250 wügüriña houngua luagun Moisesi. Hariñaga lun: “Buchá wawagu hubá! Ka uagu buguya lubéi alidihabei ani Aarón fádiri le íñutimabei? Anihein giñe Heowá wama, mámarügü buma o luma Aarón”. Magundanti Heowá lau le hariñagubei ladüga ariha lani kamá hiñuraguña houngua luagun.

Aba lariñagun Moisesi lun Koré luma houn ha lúmabaña: “Ñübuin humá tubadun sanduariu haruga, hanügame kupali lidan lagei. Larufudubei Heowá ka lan lanúadirubei”.

Laruganbei, aba lidin Koré hama 250 wügüriña hagía adunragua luma Moisesi tubadu sanduariu. Águdahatiña kupali ñein kamá hamuga fádirigu hagía. Ábati lariñagun Heowá lun Moisesi luma lun Aarón: “Dise humá luéi Koré luma hawéi gürigia ha lúmabaña”.

Íbini ñüdün lan Koré adunragua luma Moisesi tubadu sanduariu, máhati Datán, Abirán hama haduheñu houdin. Ariñagati Heowá houn ísüraelina: “Dise humá tuéi likianpun  Koré, Datán luma Abirán”. Aba hadisedun ísüraelina lau lóufudagun. Lerederati Datán, Abirán hama haduheñu rara bóugudi tuéi hakianpun. Sódini, aba ladaaragun múa, ábati láhuluchuniña! Tubadu sanduariu, rariti watu siélugiñe ábati láguduni Koré hau sun 250 wügüriña ha lúmabaña.

Lariñaga Heowá lun Moisesi: “Ragübei lubadun alidihati le lídanbei kada türibu, babürüdeime hiri luagu. Babürüdeimeti liri Aarón luagu habadun lani Lewí türibu. Bíchigeime sun badun ligía tidan sanduariu, láhüchüba fuluri luagu lubadun wügüri le nanúadirubei”.

Laruganbei, aba lasagaruni Moisesi sun badun, ábati larufuduni houn alidihatiña. Láhüchüguña meha fuluri luagu lubadun Aarón ani gínhali meha alüméndüra funaaru. Ítara liña larufuduni Heowá furangu Aarón lan lanúadirubei kei fádiri le íñutimati.