Aba lariñagun Heowá lun Moisesi: “Wariba luagun wübü le ñein nubéi. Nabürühabei nilurudun luma nugumadin luagu burí dübü fadati, ábameti níchuguni bun”. Aba lamudeirun Moisesi luagun wübü ani rédeiti ñein 40 weyu luma 40 áriebu. Sun aniha lan Moisesi ñein, aba labürüdüni Heowá Diisi Gumadi luagu bián dübü fadati, ábati líchuguni lun.

Murusun dan lárigiñe, aba hasaminarun ísüraelina ígira laaña lan Moisesi. Ligía hariñagunbei lun Aarón: “Busentiwa aban alidihati. Adügabá aban bungiu woun!”. Lariñaga Aarón houn: “Barǘ huméi golu le húmabei nun”. Aba larürüdaguagüdüni lun ladügün aban guáriua le lenege aban liraüraü bágasu. Hariñagati gürigia: “Liraüraü bágasu le wabungiutebei ani ligía asagarubaliwa Ehiptugiñe!”. Efeduhatiña ani huduguatiña lun liraüraü bágasu lauti golu ligía. Wuribati san le hadügübei? Anha, ladüga füramase haaña meha lun Heowá lúnrügüba lan háhuduragua ani magunfulirun hamuti.

 Ariha lumuti meha Heowá sun le asuseredubei, ligía lariñagunbei lun Moisesi: “Rariba le ñeinhin habéi gürigia, ladüga maganbaditiña nun. Háhuduraguña lun aban bungiu mama inarüniti”. Aba lararirun Moisesi luéigiñe wübü lau biángubei dübü fadati lúhaburugu.

Dan layarafadúnbei Moisesi tun kianpu-agei, aba laganbuni heremuhan gürigia. Dan lachülürünbei, ariha lumutiña abinaha luma áhuduragua lun bágasu ligía. Aba lagañidun, ábati lachüürüni dübü fadati múarugun, aba labouchagun. Lau lóufudagun, aba lagünrinchaguni Moisesi guáriua ligía, ábati lálügüdüni Aarón: “Ka san uagu bafalaraña gürigia ha lun badügüni luriban katei le?”. Aba lóunabun Aarón: “Magañidabá numa, subudi baaña gürigia ha. Busentiña buga aban bungiu, ligía níchugunbei golu wáturugun, ábati lasaliragun liraüraü bágasu le”. Moun lumuti hamuga meha ladügüni Aarón lira. Ábayati lamudeirun Moisesi luagun wübü, aba layumuragun lun Heowá lun feruduna lániña lumutuniña.

Feruduna lumutiña Heowá ísüraelina ha busenbaña gaganbadi hamá lun. Wéiriti meha lisudinin gaganbadi hamá lun Heowá luma lun Moisesi, adián?