Kéiburi bián hati lárigiñe háfuridun ísüraelina Ehiptugiñe, aba hachülürün luagun wübü Sinaí, ábati híchugunu hakianpun-agei ñein. Ariñagati Heowá lun Moisesi lun lamudeirun luagun wübü ligía, ábati lariñagun lun: “Au esefurubaliña ísüraelina. Ánhaña gaganbadi nun, gúnfuli hameime nilurudun, hagíaba numutuniña ha hínsiñetimabaña nun hádangiñe sun gürigia”. Dan lararirunbei Moisesi luéigiñe wübü, abahüdagua lumuti sun le lariñagubei Heowá houn ísüraelina. Ka hariñagubei? Óunabatiña: “Wadügübei sun le lariñagubei Heowá”.

Ábayati lamudeirun Moisesi luagun wübü. Ñein lariñaga Heowá lun: “Nayanuhaba hama numutuniña gumugu weyu haruga. Ariñagabá houn lun mouchun lan ni aban hádangiñe lamudeirun luagun wübü Sinaí”. Dan lararirunbei Moisesi luéigiñe wübü, aba lariñagun houn ísüraelina lun haranserun lubá haganbuni Heowá.

Lǘrüwanbei weyu, aba harihin ísüraelina labirihaniga luma aban dúeri búriti luagu wübü. Aganbatiña giñe ladürürühan wayuhuru here luma tinwinrúniwa fidu. Aba lararirun Heowá luagun wübü labadinagua watu gemeti. Ábati habuinchun ísüraelina lau anufudei. Darugu liña meha gumuleli lau wübü, hanarime ligía ladadagarun. Iñureina liña meha giñe tamuri fidu. Ábati lariñagun Bungiu: “Heowá au. Moun lumuti háhuduragun houn amu búngiugu”.

Ábaya lamudeirun Moisesi luagun wübü, ábati líchuguni Heowá lilurudun lun lun lederegeruni houn ísüraelina libügürü ida luba lan háhuduragun luma hóuserun. Bürǘ lumuti Moisesi lúrudu burí ligía, ábati laliihani houn ísüraelina. Aba füramase hamá: “Wadügübei sun le lariñagubei Heowá”. Ítara liña hadügün aban füramasei lun Bungiu, hagunfulirubei funa san?