Dan meha luáguñein lubéi wübü Sinaí Moisesi, ariñagati Heowá lun lun ladügün aban sanduariu. Kianpu espechalitu to ídanboun gayara lan háhuduragun ísüraelina lun Bungiu. Gayaraabei meha hanügünu sanduariu hámagua le ñeinhin lumuti houdin.

Ariñagati Heowá: “Ariñagabá houn gürigia lun híchuguni le hayaraati lun hídehan lidan tadügǘn sanduariu”. Rútiña ísüraelina golu, pülata, kóbüre, dübü buíduburiti luma burí katei gebegiti. Rútiña giñe gamisa lautu liyu mudún, linu, hara animaalugu luma saragu amu katei. Gíbeti meha katei hedewehan darí lun lariñagun Moisesi houn: “Hebé hanügün, gíbeyaali katei wama”.

Ídehatiña saragu wügüriña hama würiña ha gadügaatiña wadagimanu lidan tadügǘn sanduariu. Ruti Heowá lichú aau houn lun buidu lan lasalirun wadagimanu. Añahein meha adaagutiña filu, gamisa o aborudaha. Amu aranseha dübü, adüga wadagimanu lau golu o íbaaha fulansu.

Adüga hamutu ísüraelina sanduariu kei lariñaguni Heowá houn. Adügatiña giñe aban tubuidun korutína lun hafanreinraguni Fulasu Sánduti luéi Fulasu le Sándutimabei. Lidan meha Fulasu le Sándutimabei tichugúa bágüsi to lánina daradu, to adügǘboun lau fulansu le akasia luma golu. Lidan Fulasu Sánduti, anihein meha aban lebu sanudelu lauti golu, aban dábula luma aban latarü lun lágudahoun kupali. Anihein meha giñe aban ágeidinaü lauti kóbüre lidan tibürürün sanduariu luma aban óunwenbu latarü. Dan meha harihinu ísüraelina bágüsi to lánina daradu, ábaha haritaguni füramase haaña lan  lun Heowá gaganbadibaña lan lun. Subuditi bun ka lan daradubei? Aban füramasei espechaliti.

Anúadira lumuti Heowá Aarón hama lisaanigu lun heseriwidun kei fádirigu tidan sanduariu. Mosu meha hóunigirunu, adüga hagíame adagaragüdüni lun Heowá ñein. Aarónrügüñein meha, fádiri le íñutimabei, ibiha üma lun lebelurun lidoun Fulasu le Sándutimabei. Beluti meha ñeinhin aban wéiyaasu luagu irumu lun ladagaragüdün luagu lifigoun, luagu hafigoun liduheñu luma luagu hafigoun sun ísüraelina.

Gumú hamuti ísüraelina hadügünu sanduariu, aban irumu lárigiñe háfuridun Ehiptugiñe. Aniheinhali meha aban fulasu hama lun háhuduragun lun Heowá.

Ruti Heowá aban dúeri tóugiñe sanduariu, adüga ligía lun tabuinchun lau luéirigun. Anhein meha eredera dúeri tóugiñe sanduariu, rédeitiña meha ísüraelina le ñein habéi. Anhein méhati iñuragua, subudi hamaali meha mosu lan houdin lidoun amu fulasu. Aba méhati haragachagunu sanduariu, ábati houdin lárigi lárigi dúeri.