Biámañanu meha lisaanigu fádiri íñutimati Elí: Ofuní luma Fineesi. Heseriwiduña meha biángubei kei fádirigu tidan sanduariu. Maganbaditiña meha lun lilurudun Heowá, wuriba ligía hóuseruniña gürigia. Dan meha hadagaragüdün ísüraelina lun Heowá, ábaha lárügüdüni Ofuní luma Fineesi úi le buídutimabei houngua. Lau sun meha subudi lani Elí le hadaagubei lisaanigu, mererehanti houn. Kaba meha ladüga Heowá?

Íbini meha wéinamugaaña lan Ofuní luma Fineesi luéi Samueli, madügün lumuti katei burí wuribati le hadügübei. Gúndaati meha Heowá lau Samueli. Aban guñoun, dan le larumuguña lan Samueli, aba laganbun aban umalali agúaha lun. Aba lásaarun, ábati léibaagun le ñeinhin lubéi Elí, lariñaga lun: “Anahán ya!”. Lariñagati Elí lun: “Magúahantina bun. Béibaaya arumuga”. Aba lidin Samueli arounra. Ábaya lasuseredun ligiaméme luagu libiaman wéiyaasu. Dan laganbubalin Samueli umalali luagu lǘrüwan wéiyaasu, aba lasubudiruni Elí Heowá lan agúahabei lun. Ábati lariñagun Elí lun Samueli ánheinya lan laganba umalali ligía lun lan lóunabun: “Badimureha Heowá, laganbuñadibu bubuein”.

Ábayati lidin Samueli arounra. Ani ábaya laganbuni umalali agúaha  lun: “Samueli! Samueli!”. Ábati lóunabun: “Badimureha Heowá, laganbuñadibu bubuein”. Lariñaga Heowá lun: “Ariñagabá lun Elí nabeichaali lan hau sun liduheñu. Ladüga lau sun subudi lani hadaaguña lan lisaanigu katei burí wuribati tidan nisanduariun, mererehanti houn”. Larugan binaafin, aba ladaaraguni Samueli tubenari sanduariu kei ladügüni súnwandan. Hanufudeti yebe Samueli lariñaguni lun fádiri íñutimati ka lan lariñagubei Heowá lun. Ábati lagúarun Elí lun, lariñaga lun: “Niráü! Ka lariñagubei Heowá bun? Ariñagabéi sun le lariñagubei bun nun”. Ariñaga lumuti Samueli lun Elí ka lan lariñagubei Heowá lun.

Meredeti ladundehani Heowá Samueli eibu aweirideina lan. Rútiña sun ísüraelina fe anúadira laali lan Heowá Samueli kei profeta luma alidihati.