Dan lárigiñe, ábaya hadisedun ísüraelina luéi Heowá, ábati háhuduragun houn búngiugu mama inarünitiña. Sédüñein irumu hau madianna íweruhaña habiñanigu ísüraelina luma agünrinchaguei hachari. Aramudaguatiña ísüraelina hawéi madianna lidan burí huyu luagu dübü luma ligibuagu burí wübü. Amuriahatiña luma Heowá lun lesefuruniña. Ábati lóunahan Heowá aban ánheli ayanuha luma aban wügüri nibureingili gíriti Hedeón. Lariñaga ánheli ligía lun: “Anúadira láadibu Heowá lun aban ban wuriburuguna héreti”. Ábati lálügüdüni Hedeón: “Ida lubati nesefuruni Ísüraeli? Ni kátagu au”.

Ida lubati lasubudiruni Hedeón anúadira laali lan Heowá? Ruti murusun lura mudún múarugu ani ariñagati lun Heowá: “Anhein mabei múa haruga binaafin ani dǘdüti lura mudún le, nasubudirubei busén ban nesefuruni Ísüraeli”. Laruganbei, wéiriti lidüdü lura mudún, ánheinti múa, mábeiti! Ábati lamuriahan Hedeón lun mabei lan lura mudún larugan binaafin, múame düdü. Dan lasuseredunbei ítara, aba lachoururuni Hedeón anúadira laali lan Heowá. Ábati lóundaraguniña lisudaranigu lun lidin ageindagua hama madianna.

 Aba lariñagun Heowá lun Hedeón: “Nadügüba lun hagañeirun ísüraelina. Gíbetiña súdaragu buma, anhein hagañeira wuribu hasaminaruba lau lan habafu hagañeira. Ariñagabá houn sun ha hanufudebaña lun houdin hábiñoun”. Ligía hóudinbei 22,000 súdaragu hábiñoun, heredera 10,000. Lariñaga Heowá lun: “Gíbegiña súdaragu buma. Barübaña ata duna. Sun ha erederutiña ariha anhein añate lubéi áganiñu sun añaha lan ata duna, hagialá bígira”. Ǘrüwarügüñanu-san wügüriña eredera agagudúañu sun añaha lan ata duna. Füramaseti Heowá fiuba lan wügüriña hagía agañeiraña 135,000 súdaragu madianna.

Guñoun ligía, ariñagati Heowá lun Hedeón: “Gayaraahali bageindagun hama madianna!”. Aba líchugun Hedeón fidu lauti haganchun animaalugu houn lisudaranigu, diná burí migifeti lau aban tochi lidan. Lariñaga houn: “Ariha huméi le nadügübei, hadügeime ligiaméme”. Aba línwinruni Hedeón lifidun, bóugualei diná, ánhinha lumuti giñe tochi le lúmabei, ábati lagúaragun: “Lefeinte Heowá luma Hedeón!”. Ligiaméme giñe hadügübei 300 lisudaranigu. Aba héibaagun madianna kei lülü tau lidoun sun oubaü buin lau anufudei. Lidan chagaguaü ligía, ageindaguatiña hámagua. Ábaya líderaguniña Heowá ísüraelina agañeiraña háganiñu.