Lárigiñe lounwen Saulu, gumeseti Dawidi arúeiha dan meha darandihali irumu lau. Saragu irumu lárigiñe, adügati Dawidi aban lueirin charati. Aban guñoun, dan le aniha lan urúei Dawidi tábulugu luban, aba larihin aban würi magadiñetu ñéingiñe. Aba lasubudiruni Dawidi Betüsawé lan tíribei ani lani lan aban lisudaran gíriti Uríasi weiriou. Óunahati Dawidi anügoun Betüsawé lúbiñoun, aba lagamaridunu, ábati tadageinadun. Hóuchati Dawidi laramuduni le ladügübei. Aba lariñagun lun hábuti lisudaranigu lun líchuguni Uríasi igibugiñoun lidan wuribu, ígira hameime lábugua. Hilati Uríasi lidan wuribu ligía. Lárigiñe, aba lamarieidun Dawidi tuma Betüsawé.

Aríagu liña meha Heowá lun sun katei wuribati le asuseredubei. Kaba méhati ladüga Heowá? Óunaha lumuti profeta Natán ayanuha luma Dawidi. Ariñagati lun: “Ñeinñein meha aban wügüri rísiti le galügünbei saragu mudún luma aban wügüri gudemeti le galügünbei ábanrügü tiraüraü mudún ani wéiriti tínsiñe lun. Aba lagidarunu wügüri rísiti tiraüraü mudún to lúmaboun wügüri gudemeti ligía luéi”. Aba lagañidun Dawidi saragu, ábati lariñagun: “Lunti lounwen wügüri rísiti ligía!”. Lariñaga Natán lun: “Ítara biña kei wügüri rísiti ligía!”. Aba lírudagun Dawidi saragu, ábati lariñagun lun Natán: “Afigouhaadina ligibugiñe Heowá”. Barüti figóu le saragu turobuli lun Dawidi luma houn liduheñu. Lau sun bei lani Heowá Dawidi, ígirati lun lasigirun awinwanda ladüga larufudun haruma tan lanigi ani ǘnabugu lan.

Busenti meha Dawidi lábunagun aban ténpulu lun Heowá. Gama lumoun, anúadira lumuti Heowá Salomón, le lisaani Dawidi, lun ligíaba lan ábunaguoun ténpulu. Ligía lagumeserunbei Dawidi aransehei sun katei lubá Salomón, ábati lariñagun: “Mosu wéiribei lan tuenden litenpulun  Heowá. Kei nibureingili lan Salomón, níderaguaali aranserei sun katei”. Edewehati Dawidi saragu seinsu lubá ábunaguni. Áluahati saragu wügüriña ha buítiña lidan sun luwuyeri wadagimanu, óundaraguati golu luma pülata, barügüda ligía fulansu hibúari Tírugiñe luma Sidongiñe. Dan le yarafaali dan lun lounwen Dawidi, aba lederegeruni dibuhu le arufudubalin ida tuba lan ténpulu lun Salomón, ábati lariñagun lun: “Heowá ariñagubei nun lun nabürüdüni katei burí le deregenéime bun. Manufudedabá, líderagubadibu. Mosu derebugu ban adügabéime wadagimanu”.