Aba lariñagun Heowá lun Samueli: “Beiba lúbiñe Hesé. Anúadiraadina aban hádangiñe lisaanigu lurúeiteme Ísüraeli leweñegua Saulu”. Ábati lidin Samueli ñein. Dan le larihinbalin lisaani Hesé le íbugañaü, aba lasaminarun: “Chóuruti nibureinti lan le lanúadirubei Bungiu”. Ariñagati Heowá lun Samueli mama lan ligía. Lariñaga lun: “Mama ligaburi harihíniwa gürigia narihibei, ariha numuti le tídanbei hanigi”.

Barüyati Hesé sisi hádangiñe lisaanigu lun larufuduniña lun Samueli. Ani aba lariñagun Samueli: “Manúadirunti Heowá ni aban. Gasaanitibu san amu?”. Lariñagati Hesé lun: “Aniheingua Dawidi le agumuhóuni, anihein óunigiraña mudún”. Dan le lebelurunbei Dawidi, aba lariñagun Heowá lun Samueli: “Ligía le!”. Ábati léserun Samueli agülei lábulugun Dawidi. Ítara liña lanúadiruni lun ligía lan iseri lurúeite Ísüraeli.

Dan lárigiñe, aransetiña ísüraelina lun hageindagun hama filistéana. Lubaragiñe lagumeserun wuribu, sagü meha weyu ladügün aban hígandei gíriti Goliadi bula hau ísüraelina. Agúarahati ítara: “Óunaha humá aban wügüri lun lageindagun numa. Ánhana lagañeira, hidamunbadiwa. Ánheinti nagañeira, wadamunbadün”.

Ñǘdünti Dawidi tidoun hakianpun-agei súdaragu íchiga éigini houn líbugañanu ha asudarahabaña. Aganba lumuti le lagúarahabei Goliadi, ábati lariñagun: “Nídiba ageindagua luma!”. Lariñagati urúei Saulu lun: “Ñǘraügidibu”. Aba lóunabuni Dawidi: “Líderagubadina Heowá”.

 Furedei lumutu yebe Saulu ladaüragun to lánina wuribu lun, gama lumoun ariñagati Dawidi lun: “Siñati nageindagun tau katoun to nuougua”. Aba lárügüdünu Dawidi lani chilinchádi, katoun to auboun lachüürǘwa dübü lun ladagarun dise. Ábati lidin lidoun aban duna éibaaguati abuda seingü dübü guyeti, aba ládaruni tidoun lisagüte. Lárigiñe, aba léibaagun le ñeinhin lubéi Goliadi. Ábati lagúaragun hígandei ligía: “Irahü buguya le, yarafabá, bariha numa! Níchigaadibu houn dunuru luma houn animaalu áraabuna lun héiginibu”. Aba lóunabun Dawidi manufudeuga: “Biábiña ageindagua tau eféin luma arufun, ánheinti au nageindagua lidan liri Heowá. Mama wama bageindagua, luma Bungiu bageindagua. Harihibei sun ha yáabaña wéiritima lan lubafu Heowá sügǘ tau eféin luma arufun. Lederegeraadün Heowá woun”.

Ábati líchugun Dawidi aban dübü tidoun lani chilinchádi, aba lachüürüni lau sun lere. Lau lídehan Heowá, aba lidin dübü ligía áfara lereberugu Goliadi. Hilati hígandei ligía. Ábati hanurahan filistéana lun máfarawagun hamá. Afiñetibu san luagu Heowá kei meha Dawidi?