Yónatan meha líribei lisaani urúei Saulu le íbugañaü, ani aba meha súdara ganigiti ligía. Ariñagati Dawidi furese lan meha Yónatan sügǘ hau ágila, here ligía sügǘ hau liñún. Aban weyu, aba larihin Yónatan fiu súdaragu filistéana luagu aban wübü. Ábati lariñagun lun le íderagubalin anaahoun lárumate: “Ánhaña ariñaga filistéana woun lun wamudeirun, larufuduñein Heowá woun gayara lan wábürühan hawagun”. Aba hagúaragun filistéana: “Warí humá ñahoun lun wageindagun!”. Ábati lamudeirun Yónatan luma le íderagubalin luagun wübü ani áfaratiña 20 súdaragu.

Kei Yónatan lan meha lisaanibei Saulu le íbugañaü, ligíaba hamuga meha urúei lárigiñe lounwen lúguchi. Gama lumoun, subudi lumuti meha Yónatan anúadira laali lan Heowá Dawidi lun ligíaba lan lurúeite Ísüraeli lárigiñe Saulu, ani magimuganti lun. Lubaragiñe lira, aba gamadagua lan Yónatan luma Dawidi buidu buidu. Füramasetiña houngua hóunigiraguba  lan hóuniwagua. Ábati líchugunu Yónatan ligounun, lefeinte, ligimaran luma lubelitin lun Dawidi lun larufuduni lun gamadagua hamá.

Dan le lanurahanbei Dawidi luéi Saulu, ñǘdünti Yónatan arihei, lariñaga lun: “Mosu ganigi ban here buguyame. Anúadira láadibu Heowá lun urúei ban. Íbini núguchi subudi lumuti lira”. Hínsiñeti hamuga san bun gamada ban aban gürigia buiti kei Yónatan?

Ru lumuti Yónatan libagari lidan denchaü lóugiñe aban wéiyaasu lun líderaguni lumada. Kei meha busén lubéi urúei Saulu, le lúguchi, láfaruni Dawidi hilagubei, aba lariñagun lun: “Bafigouhaba anhein báfara Dawidi lugundun madügüngili ni kata wuribati”. Ábati lagañidun Saulu luma Yónatan.

Fiu irumu lárigiñe, hilati Saulu luma Yónatan lidan aban wuribu. Lárigiñe, aba láluahani Dawidi Mefi-bosetü le lisaani Yónatan. Dan ladarirunbalin, aba lariñagun lun: “Nóunigirubadibu lidan sun bibagari ladüga buíduti meha numadagua luma búguchi. Bawinwanduba núbiñe ani béigiba numa luagu nidabulan”. Mabulieidun lumuti Dawidi Yónatan le lumada.