Wuribatiña meha bandi hádangiñe urúeigu ha agumadihabaña lidan arúeihani ísüraelina le lánina diisi türibu. Aabü meha aban hádangiñe ha wuribatimabaña. Maríeiti tuma aban würi to wéiriti turiban to meha áhuduraguboun lun Baali. Hesawéli meha tíribei. Adügati Aabü tuma Hesawéli lun háhuduragun bandi gürigia lun Baali ani áfaragua hamutiña lani Heowá profetagu hilagubei. Ka ladügübei Heowá? Óunaha lumuti profeta Elíasi íchiga aban uganu lun Aabü.

Ariñagati Elíasi lun urúei Aabü máhuyunbei lan huya Ísüraeli ladüga luriban. Wéiriti meha halama gürigia ladüga máhüchün lan nadü luagu lóugiñe ǘrüwa irumu. Ábaya lóunahani Heowá Elíasi ayanuha luma Aabü. Ábati lariñagun urúei lun: “Bidurun anihein lubéi sun turobuli le wageira!”. Lariñaga Elíasi lun: “Mama nidurun máhuyun lubéi huya, buguya gadurunbei ladüga báhuduragun lun Baali. Adüga wamá aban katei arihúa láamuga ka lan Búngiubei inarüniti. Óundarabaña lílana ageiraü hama lani Baali profetagu ligibuagu wübü Karümélu”.

Aba hóundaragun gürigia ligibuagu wübü. Ábati lariñagun Elíasi: “Anúadaha humá. Anhein Heowá lubéi Búngiubei inarüniti, falá huméi. Anhein Baali lubéi, falá huméi Baali. Ariha waméi ka lan Bungiu inarünibei. Lunti haranserun 450 lani Baali profetagu aban adagaragüdüni, ábameti hagúahan lun habungiute. Naranseruba giñe aban adagaragüdüni, ábame nagúahan lun Heowá. Le óunabuti lau watu ligía Bungiu inarünibei”. Ánhatiña gürigia hadügüni le lariñagubei Elíasi.

Aransetiña lani Baali profetagu aban adagaragüdüni. Ábati herederun sun weyu agúaha lun habungiute: “Baali, óunababawa!”. Kei móunabun lan Baali, aba ladügün Elíasi bula lau. Lariñaga: “Hagúaha lau sun here. Háfuga larumuguña ani mégeiti lagagudahóun”. Chülüti rábounweyu hau lani Baali profetagu agúaraha. Úati óunabuti.

Ábati líchuguni Elíasi ladagaragüdün luagu aban latarü ani seti saragu duna luagun. Lárigiñe, aba lafurieidun: “Heowá, adügabá lun hasubudiruni gürigia buguya lan Búngiubei le inarüniti”. Ouraméme ligía, aba lóunahan Heowá watu siélugiñe lun láguduni adagaragüdüni. Ábati hagúaragun  gürigia: “Heowá Búngiubei inarüniti!”. Aba lariñagun Elíasi: “Mígira humá lun hanurahan lani Baali profetagu!”. Afarúatiña 450 lani Baali profetagu weyu ligía.

Dan le larihinbei Elíasi aban liraüraü dúeri lóugiñe barana, aba lariñagun lun Aabü: “Lésera huya. Dinaba tidoun bikarün, beiba búbiñoun”. Aba laburigadun sielu lau bandi dúeri, áfuha ligía garabali, ábati léserun huya. Sunha meha lidaani lumabeigan. Abugaha lumutu Aabü likarün furese furese. Lau lídehan Heowá, furesetimati léibaagun Elíasi tuéi karü! Ñein funa san lagumucha sun lituróbulin Elíasi? Ariha waméi.