Sun dan le laubei Salomón áhuduragua lun Heowá, anihein meha darangilaü Ísüraeli. Gama lumoun, aba lamarieidun Salomón hama bandi würiña ha lídangiñetiña amu fulasu ani huduguatiña würiña hagía houn guáriua. Murusun murusun, aba lasansirun Salomón ani gumeseti áhuduragua houn guáriua. Ábati lagañidun Heowá, ariñaga ligía lun: “Nagidaraali arúeihani ísüraelina hawéi biduheñu, ábame lafanreinragun lidan biama. Níchigaali fánreinti le wéiritimabei lun aban hádangiñe bubueingu, ábameti harúeihan biduheñu luagu aban liraüraü fánreinti”.

Adügati Heowá amu katei lun larufuduni ka lan labusenrubei lariñagun. Lidan laweiyasuhaña lan aban lubúein Salomón gíriti Heroboamü dúnguati luma profeta Aíasi ǘmada. Ábati laheiridagunu Aíasi ladaüragun lidan 12 murusun, aba lariñagun lun Heroboamü: “Lagidaraali Heowá arúeihani ísüraelina hawéi liduheñu Salomón, ábameti lafanreinragun lidan biama. Ragüba diisi murusun ladüga buguyaba arúeiha luagu diisi türibu”. Aganbati urúei Salomón luagu lira, ábati labusenrun láfaruni Heroboamü hilagubei! Ligía lanurahanbei Heroboamü Ehiptun. Lau lásügürün dan, aba lounwen Salomón, ábati larúeihan Roboamü le lisaani leweñegua. Kei chóuruhali lan lasandiragun Heroboamü lungua, aba lagiribudun Ísüraelin.

 Ariñagatiña wéiyaaña ha Ísüraelibaña lun Roboamü: “Ánhaña bóusera gürigia buidu, úaraguabaña bun”. Ánhañati lumadagu ha nibureingiña, ariñagatiña lun: “Mosu bóuseruniña gürigia wuriba! Adügabá lúntima hawadigimaridun!”. Adüga lumuti Roboamü le hariñagubei lumadagu nibureingiña lun. Óusera lumutiña gürigia lau saragu wuribani, ligía aba lubéi maganbadi hamá lun. Adüga hamuti Heroboamü urúeime luagu diisi türibu, ábati lasubudirúniwa kei arúeihani ísüraelina. Le líbiri bián türibu subudiwati kei arúeihani hudaana, hagía erederubaña luma Roboamü. Fánreinguaali meha 12 türibu ísüraelina.

Mabusenrunti meha Heroboamü lun houdin lumutuniña áhuduragua Herusalén, le meha ñein lubéi larúeiha Roboamü. Subuditi bun ka lan uagu? Hanufudeti meha Heroboamü hígiruni gürigia lun gaganbadi hamá lun Roboamü. Ligía ladügünbei bián bágasu láutiña golu, ábati lariñagun houn lumutuniña: “Wéiriti lidise Herusalén. Gayaraati háhuduragun ya”. Aba hagumeserun gürigia áhuduragua houn bágasu láutiña golu, ábayati habulieiduni Heowá.