Íbirigu hínsiñewatiña:

Hínsiñetu Bíbülia, to Lererun Heowá woun, wagía le áhuduragubei lun. Chouru wamuti darí wamá abahüdaguni inarüniti tidan, adundehani lun wabagari le gayaraati wafiñerun luagu luma ámuñegueinarügü katei le íderagubaliwa arihei weiri lan hínsiñe gürigia lun Heowá (Sálumu 119:105; Lúkasi 1:3; 1 Huan 4:19). Ayumahatiwa tídangiñe sun wanigi lun wíderagun amu gürigia afurendeirei inarüni wéiriti lebegi le tídanbei Lererun Bungiu. Ligía gunda wabéi wíchugunu líburu to hun: Le larufudahabei Bungiu nun tidan Bíbülia. Wariñaga fiu katei hun tuagu líburu to.

Hawagun irahüñü lasaminarúa dan le tadügǘnbei líburu to. Gama lumoun, tahuuduba giñe lun larufudahóun houn gürigia wéinamugaaña ha busentiña hafurendeirun tuagu Bíbülia. Kei houn lubéi sun gürigia tadügǘwa Bíbülia, chóuruti sun lan wagía wasagaruba buiti lídangiñe le tarufudahabei, lugundun gayaraati tíderaguniwa lun gunda wamá le tímatimaati.

Tídangiñe Bíbülia lasagarúa abahüdaguni burí le tídanbei líburu to, ani gumesetu abahüdagua woun lúmagiñe hadügǘniwa gürigia. Adügǘwaali aban óunwenbu áfaaguni lun furangu lan abahüdaguni le tídanbei ménrengun ligíame gunfurandawa lan, ani sagü gayara lan, abahüdawagúati kada sügǘ kei asuseredeina lan.

Mama abahüdaguarügü tumuti líburu to sügǘ burí le tídanbei Bíbülia. Dandu ariñahani kei dibuhu burí le tídanbei, adügǘwati lun líderaguniwa asaminara luagun sügǘ le tabahüdagubei Bíbülia luma lun gunfuranda wamani le hasandirubei gürigia ha uágubaña labahüdawagúa.

Íderagua tumutiwa agumeiraguagüdüni to arihei ayanuha tan Bíbülia woun hawagu gürigia: ha meha gaganbadibaña lun Heowá hama ha maganbadibaña lun. Íderagua tumutiwa giñe afurendeira lídangiñe hénpulu le híchugubei (Rómana 15:4; 1 Korintuna 10:6). Katorusuñein fánreinti tidan líburu to. Lidan lagumeseha kada aban, afuranguagüdawati fiu lídangiñe katei le gayaraabei wafurendeiruni lídangiñe.

 Anhein gasaanigu hubéi, gayaraati haliihan aban kapítulu hama, ábameti hayanuhan hama luagu dibuhu burí le tídanbei. Lárigiñe, gayaraati haliihani bérusu burí le ídangiñebei lasagarúa ariñahani le lídanbei kapítulu ligía. Íderagua huméi hisaani lun gunfuranda lani ka lan lánibei le haliihabei tídangiñe Bíbülia luma le arufudahóubei lidan kapítulu le tídanbei líburu. Gayaraati ladügǘniwa ligiaméme lun líderawagun aban gürigia le wéiriaali asubudirei ka lan uagu tayanuha Bíbülia.

Ayumahatiwa lun tídehan líburu to lun hafurendeiruni gürigia haruma tanigi, dandu nibureingiña kei wéinamugaaña, le tarufudahabei Lererun Bungiu falá hameime lidan habagari. Ítarati gayaraabei giñe háhuduragun lun Heowá hádangiñe hamaamuga liduheñu ha hínsiñebaña lun.