Murusun dan lubaragiñe lounwen Hesusu, ariñagati: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14). Ida luba méhati lapurichihóun uganu buiti lidan sun ubóu? Mosu lasigirúniwa hénpulu le líchugubei Hesusu dan le ya lubéi ubouagu (Lúkasi 8:1).

Bisida wamutiña gürigia hábiñe. Arufudahati meha Hesusu houn lani disipulugu lun hapurichihani uganu buiti muna tuagu muna (Matéu 10:11-13; Adügaü 5:42; 20:20). Ha furumiñetiña apurichihatiña ha ariñawagúati meha houn furangu halíaba lan hapurichiha (Matéu 10:5, 6; 2 Korintuna 10:13). Ítarameme, adügǘwati giñe buiti aransehani lubá wapurichihan, ani kada damuriguaü iridúati houn kaba lan fulasu hapurichiha luma halíaba lan hébeda. Ítarati, gayarati wagunfulirun lau gumadi le líchugubei Hesusu lun ‘wapurichihan houn sun gürigia’ (Adügaü 10:42).

Áfaaguatiwa lun wachülürün hamoun gürigia meberesenga halíañanu lan. Ru lumuti giñe Hesusu hénpulu lau lapurichihan lidan fulasu le ñein hamuti gürigia, kéiburi laru beya o lurugabu aban fusu le ñein lubéi meha houdin gürigia adaburagua duna (Márükosu 4:1; Huan 4:5-15). Ítara kei ligía, ayanuhatiwa giñe tuagu Bíbülia houn gürigia ñein lumuti wadarira chansi: ǘmadarugu, lidan burí bísinisi, párükerugu o lau gágamuru. Ayanuhatiwa giñe luagu wafiñen houn wabesinanigu, wánigu paaná lidan wadagimanu, leskuelarugu luma houn waduheñu dan le anihein lan chansi. Adügaali katei le lun haganbuni saragu míñunu gürigia lidan sun ubóu uganu buiti “luagu lesefuhan” Heowá (Sálumu 96:2).

Samina humá luagun aban gürigia le unbei habusenra hayanuhan luagu uganu buiti luáguti Larúeihan Bungiu luma luagu le mini lubéi lun lubá ámuñegü. Mareida huméi uganu lánina emenigini le húnguarügü. Subudigüda huméi houn amu lidan furumiñeti chansi le hadarirun.

• Ka “uganu buiti” lunbei wasubudiragüdüni?

• Ida liña wáyeihani wagía gefentiña luagu Heowá ligaburi lapurichihan Hesusu?