Lubaragiñebei lasuseredun, ariñagatu Bíbülia lárigiñe lanme lounwen Kristu añaheinbaña lan máisturugu yéetiña hadan furumiñetiña kristiánugu ani hagadeirubei lan inarüni le tídanbei Lererun Bungiu (Adügaü 20:29, 30). Ani ligía asuseredubei: aba hamigisiruni máisturugu yéetiña larufudahan Hesusu luma arufudahani le mama kristiánu, ítara liña lagumeserun arufudahani mama inarüniti hadan kristiánugu (2 Timotéu 4:3, 4). Kati uagu chouru wabalin luagu gunfuranda wamani buidu kátima lan tarufudahabei Bíbülia?

Chülüti dan lun lafuranguagüdüni Heowá inarüni. Ariñagati meha Bungiu lidan lanme lagumuhóun dan ha chúbaña aau “gunfuranda habéi sun katei” luáguti inarüni (Danieli 12:9, 10). Lidan irumu 1870, aba gunfuranda lani sétanu le áluahabalin inarüni luagu mama lan tídangiñeti Bíbülia libe-agei katei le arufudahóubei tidan Ligilisi. Ligía anügübaliña lun hakutihanu Bíbülia lun harihini kátima lan tarufudahabei, ani íderagua lumutiña Heowá lun gunfuranda hamanu buidu.

Fiú wügüriña haruma tanigi akutiha hamutu meha Bíbülia buidu. Binadu Aturiahatiña Bíbülia hagía aturiaha hamutu Bíbülia kei waturiahanu uguñe weyu: tema luagu tema. Dan le hadunragun luma aban bérusu hénrenguti, aba háluahan amu bérusu le lunbei líderaguniña lun gunfuranda hamani bérusu le hénrengubei, danti le harihini luagu úaragua lan luma le líbiri bérusu, aba habürüdüni. Ítarati, lau hígirun lun Bíbülia guánarügü lan afuranguagüdei katei, chülüguagüda hamuti inarüni luagu liri luma Larúeihan Bungiu, lisuuni houn gürigia luma lun Ubóu, le gádanbaliña hilaaña luma emenigini luagu águyuguni. Le hakutihabei íderagua lumutiña meha lun halibürerun luéi saragu afiñeni luma burí échuni le charati (Huan 8:31, 32).

Lidan irumu 1879 gunfuranda hamuti óuraali lan meha lun hasubudiragüdüni inarüni houn sun gürigia. Lídanmeme irumu ligía gumesetiña adügoun garüdia to wayusuruboun uguñe weyu: Garüdia Atalaya. Tasubudiragüdüñein Larúeihan Heowá. Uguñe weyu, apurichiha wamuti inarüni tídangiñeti Bíbülia lidan 239 ageiraü luma lidan kéiburi 700 iñeñein. Machülüñahagili inarüni lidoun saragu ageiraü kei guentó!

• Ka asuseredubei lau inarüni le tídanbei Bíbülia lárigiñebei lounwen Kristu?

• Ida liña gayara lan wafuranguagüdüni inarüni le tídanbei Lererun Bungiu?