Dan le anihein lan aban wamada le suamei wamuti ani inebeti woun, houchatiwa lun ítara wamá kei ligía. “Buidu liña Aburemei, richá ligia”, tiña Bíbülia (Sálumu 25:8). Lun gamadagua wamá luma Bungiu, mosu gürigia wamá ha buitiña ani uaragua wagíame. Erengatu Bíbülia: “Kei lirahüñü hubéi Bungiu ha hínsiñetiña lun, houcha humá háyeihani. Hínsiñegua humá húniwagua” (Éfesuna 5:1, 2). Anihán fiú hénpulu lun gayara lan wáyeihani Heowá:

Íderaguaña ha híbiri. “Adüga waméi lubeiti le buídubei houn súngubei.” (Galasiana 6:10.)

Nadagimein lau erei. “Le meha híwerubei, hebé líweruhan, luadigimarida lau arumani lun lagüriagun lungua.” (Éfesuna 4:28.)

Kipu wamá arumani, dandu lau wágubu kei lau ligaburi wabagaridun. “Ligía lunti lubéi wachibuni sun luwuyeri iwiyei wawariua, dandu lueí wágubu kei luéi sífiri, úaragua wagíame lidan le sandubei ligibugiñe Bungiu, lau lueirin inebesei le wawagubei lun.” (2 Korintuna 7:1, RVA.)

 Lun wóuseruniñu waduheñu lau ínsiñeni luma inebesei. “Kada lan aban hídangiñe lunti lan hínsiñe tan lúmari lun kei línsiñegua lungua, lun giñe inebe lan túmari würi tun. Isaanigu, le lunbei hadügüni keisi afiñetiña lun gaganbadi humá houn hagübürigu.” (Éfesuna 5:33–6:1.)

Hínsiñe hamá ha híbiri hun. “Hínsiñegua wamá wámagua lugundun lúmagiñe Bungiu liabin ínsiñehabuni.” (1 Huan 4:7.)

Gaganbadi lun lilurudun ageiraü. “Sun gürigia lunti gaganbadi hamá houn gumadimatiña, [...]. Ru humeime le hani kada gürigia houn. Fayei huméi le laguburahabei gumadi.” (Rómana 13:1, 7.)