Umadaguaü luma Bungiu ligía katei buítimaabei lun gayara lan lasuseredun hun. Larufudahaba Bungiu hun ida luba lan hibihini ugundani luma ichouruni; lesefurubadün luéi bandi afiñeni le charati luma luéi luriban échuni le adügübei damichi. Laganbubei hayumuragun lun. Líchuguba ñuruguaü tun hanigi, ani afiñebadün huougua (Sálumu 71:5; 73:28). Líderagubadün Bungiu danme le hásügürün lídangiñe lidere dan (Sálumu 18:18). Gama lumoun, erengati Bungiu líchuguba lan aban idewesei hun, ibagari le magumuchaditi (Rómana 6:23).

Dan le wayarafadun lun Bungiu, aba wayarafadun houn lumadagu Bungiu. Ha lumadagu Bungiu humadagubaña giñe. Le linarün aban katei, ítarabaña hun kei híbirigu. Gundaabaña lun harufudahan hun luagu Bungiu, híderagubadün ani híchuguba iderebugu hun.

Mítarantiwa kei Bungiu. Dan le háluahan umadaguaü luma Bungiu, mosu gufunranda humá aban katei súdiniti: Íñutimaati Bungiu wawéi. Wéiyaali wawéi, chutimaati lau, ani gabafutimaati giñe. Ligíarügüñein garicha lun Warúeite lan. Ligíati, anhein busén wabéi lumadagu wamá, mosu waganbuni, adüga waméime le lamuriahabei wamagiñe. Buídubei lidin woun ánhawa gaganbadi lun Bungiu (Isaíasi 48:18).