Anhein ayumaha wabéi lumadagu wamá Bungiu, mosu wawinwandun úara luma relihión le unbei lánhara Bungiu. Erengati Hesusu “ha ahuduragutiñu lau inarüni” hahuduraguba lan lun Bungiu úara luma “inarüni” (Huan 4:23, 24, RVA). Ábanrügüñein igaburi richati lun lahudurawagun lun Bungiu (Éfesuna 4:4-6). Relihión le inarüniti anügübei lidoun ibagari le magumuchaditi, ani relihión le mamabei inarüni anügübei lidoun féridiguaü o óunweni (Matéu 7:13, 14).

Gayarati wasubudiruni ka lan relihión inarünibei dan le waríyaguniñu gürigia ha awinwandubani. Kei buidu lan Heowá, mosu giñe buidu hamá gürigia ha adorarübani lau inarüni. Kéisigubeirügü aban lídibu aransu le buiti, buiti aransu le líchugubei, le relihión inarüniti alubahati gürigia buitiñu (Matéu 7:15-20).

Ha lumadagu Heowá wéiriti tinebe Bíbülia houn. Subudi hamuti lúmagiñe lan Bungiu tiabin Bíbülia. Ligía hígirunbei lun tadundehani habagari, aransehateime turóbuli le hamabei ani ideraguatañame asubudireitima Bungiu buidu (2 Timotéu 3:16). Gama lumoun, áfaaguatiñu hawinwanduni le hapurichihabei.

Ha lumadagu Heowá hínsiñeguatiña hámagua. Arufuda lumuti Hesusu hínsiñe hamá gürigia lun dan le larufudahan houn luagu  Bungiu luma dan le lareidaguagüdün sánditiñu. Ha awinwandubani relihión inarüniti hínsiñetiñu giñe ha híbiri gürigia houn. Keisi Hesusu, abahüda hamutiñu gudemetiñu hama ha amubaña inásiñun. Erengati Hesusu hasubudirubei lan gürigia kátaña lan lánigubaña disipulugu ladüga hínsiñeguabaña lan hámagua (Huan 13:35).

Ha lumadagu Bungiu rutiñu inebesei lun liri: Heowá. Anhein mabuseerun lubéi somu gürigia layusuruni wiri, wamadabei hamuga le umatimabei wanagua woungua buidu? Uá! Dan le gamada wamá, wawamuti liri lun ani adimurehatiwa buidu luagu houn amu. Ligía, ha busenbaña lumadagu hamá Bungiu mosu hayusuruni liri ani adimureha hagíame luagu houn amu gürigia. Busenti Heowá lun ítara lan wadügüni (Matéu 6:9; Rómana 10:13, 14).

Keisi Hesusu, ha lumadagu Bungiu arufudahatiñu houn gürigia luagu Arúeihani le lani Bungiu. Arúeihani le lani Bungiu aban arúeihani le siélubei le lunbei ladügüni Ubóu paraísume. Ha lumadagu Bungiu subudigüda hamuti houn amu gürigia uganu buiti luagu Arúeihani le lani Bungiu (Matéu 24:14).

Áfaaguatiñu gefentiñu luagu Heowá lun lumadagu hamá Bungiu. Inebetu Bíbülia houn ani hínsiñeguatiña hámagua. Yusu hamuti liri Bungiu, rutiña inebesei lun arufudaha hagía houn amu gürigia luagu Arúeihani le lani Bungiu. Ha gefentiñu luagu Heowá winwan hamuti relihión inarüniti Ubouagu.