Gayarati wasubudiruni Heowá dan le waliihanu Bíbülia. Lüha meha anúadahati Bungiu fiú gürigia lun habürühani lisaminan. Abürühani ligía subudiwati kei Bíbülia. Guentó gayarati wasubudiruni Bungiu dan le waliihanu Bíbülia. Tídanñein Bíbülia lererun Heowá o luganute, ligía tasubudirunwabei kei Lererun Bungiu. Gayarati wafiñerun luagu le terengubei Bíbülia ladüga maweiyasunti Heowá eyeeha. “Ladüga siñá lan leyeehan Bungiu.” (Ebüréu 6:18.) Ítara liña, tídanñein Lererun Bungiu inarüni (Huan 17:17).

Bíbülia aban lídangiñe idewesei gebegitimaati le ibiha wamaalibei lúmagiñe Bungiu. Ítara tiña kamá aban gárada to labürühan aban úguchili le hínsiñehabuti houn lirahüñü. Adimurehatu woun luagu füramasei le lani Bungiu lun ladügüni Ubóu keisi aban lubuidun fulasu lun laganóun ñein, aban paraísu. Erengatu woun luagu le meha ladügübei Bungiu, le ladügübei guentó, luma le lunbei ladügüni ámuñegü houn lirahüñü ha úaraguatiña. Íderagua tumutiwa giñe aransehei wani turóbuli luma lun wadeirun ugundani (2 Timotéu 3:16, 17).

 Ha Gefentiñu luagu Heowá hagía lumadagubaña Bungiu; híderagubadün lun gufunranda humani le tarufudahabei Bíbülia. Ariñaga rügübadün houn busén humá haturiahanu Bíbülia. Maguburahan habadün luagu harufudahan hun (Matéu 10:8). Gayarati giñe hachülürün lidoun hadamuridagun kristiánugu. Tidan Luban Hadamuridagun Gefentiñu Luagu Heowá ladügüwa damuriguaü ligía. Ánhadün achülüra lidoun adamuridaguni, laganwoundaguba hufurende luagu Bungiu lau lóufudagun.

Gayarati wasubudiruni Bungiu dan le wasaminarun luagu katei le adüga laalibei. Kéisigubeirügü, erengatu Bíbülia: “Aba ladügüni Bungiu sielu luma ubóu” (Agumesehani [Génesis] 1:1). Dan le ladügünbalin Bungiu “sielu”, adüga lumuti giñe Weyu. Kateiti larufudahabei le woun luagu Bungiu? Arufudahati wéiri lan lubafu Heowá. Ligíarügüñein adüga aban katei gabafuti kei Weyu. Arufudahati giñe chu lan lau Heowá, ladüga mégeiwati lichú aau lun ladügǘn Weyu, le íchigubei larouga luma leiti méñeguchaditi.

Arufuda lumuti sun katei le ladügübei Heowá hínsiñe wamá lun. Samina humá tuagu ámuñegueinarügü tuwuyeri furuda to ligibuagubon Ubóu. Gayarati hamuga ábanrügütan tuwuyeri furuda líchugun Heowá woun o michu lan ni aban. Lau sun lira, rúhali ámuñegueinarügü tuwuyeri furuda ámuñegueinarügü tesetirun, tiseisi, tikolorun luma tigustu. Arufudahati le, hínsiñe wamá lun Heowá, areidati, fuleseihabúti ani gudemehabuti giñe (Sálumu 104:24).