Lun wadügün umadagu; ani kipu wamañame mosu wáfaagun. Áfaaguni le wadügübei lun gamadagua wamá luma Bungiu ani kipu wameime lanügüba saragu abinirúni woun. Erengati Hesusu houn ha afiñetiñu luagu: “Ábame lesefurunün [‘lalibureirunün’, RVA]” inarüni (Huan 8:32). Ka labuseerubei lerengun?

Gayarati wagundaarun lau alíbüreiruni guenlé. Gayarati walíbüreirun lídangiñe arufudahani le mamabei inarüni luma iyeeni le laburuchaguagüdübei Satanási. Gayarati giñe walíbüreirun luéi memenigini le abuinchubani habagari miñonu gürigia ha ibidiñebei Heowá houn (Rómana 8:22). Ha lumadagu Bungiu líbüretiña lídangiñe “hanufude luéi óunweni” (Ebüréu 2:14, 15).

Gayarabei hagundaarun lau líbürei lidan iseri ubóu le lani Bungiu. Báfaguagülebei líbürei le lunbei gama wamani ámuñegü! Danme le paraísuhali Ubóu, úaalime wuribu, ni sandi ni duru. Úaalime gudemei ni ilamaü. Walíbüreiruba luéi aweiyaduni luma óunweni, ítara kei luéi anufudei, amudihani, luma lídangiñe marichaü. Erengatu Bíbülia luagu Bungiu: “Tulé bumuti búhabu, aba bíchugun lau bugundan houn sun gürigia luma houn animaalugu” (Sálumu 145:16).

 Ha lumadagu Bungiu hawinwanduba lun súnwandan. Líchugubei Bungiu ibagari le magumuchaditi keisi aban lubuidun idewesei houn ha aluahabaña umadaguaü luma (Rómana 6:23). Samina huméi ka lan lilabei hun lun hawinwandun lun súnwandan.

Gadaanibadiwa lun wadügün bandi katei. Háfuga busén wamá wafurendeirun áfara aban instrumentu le lánina músika, afeindiha dibuhu o adüga wadagimanu le lánina sarafangei. Háfuga busén wamá waturiahaniñu animaalugu o inadürigu. Anhein busén wabéi gayarabei wáfayahan lun wasubudirun amu fulasu hau lílana. Kei gabagaribadiwa lan le magumuchaditi, gayarabei wadügüni sun burí katei le.

Gadaanibadiwa lun wadügün bandi umadagu. Kei wawinwanduba lan lun súnwandan, gayarabei wasubudirun bandi amu lumadagu Bungiu. Wasubudirubei iarani le hawagubei lúmagiñe hagüriahóun luma lubuidun higaburi, ani gamadaguabadiwa giñe hama. Hínsiñebaña woun, ani hínsiñebadiwa giñe houn (1 Korintuna 13:8). Kei le gabagaribadiwa lan le magumuchaditi, gayarabei gamadagua wamá hama sun gürigia Ubouagu. Le buitimaabei lídangiñe sun katei le, aweiridagueina luba lan wamadagua luma Heowá lau lasugürün sígulu. Lumadagu wamá Bungiu lun súnwandan!