“Lidan aban aüdü le lani ageiraü nórutena naweirida —⁠tabahüdahan Dauda, Sierra Leonana—. Lidan aban ókaasion, dan meha ñüraügidina, ñeiñein aban asigenehani hadan niduheñu hama amu familia luagu aban fulasu. Biángubei familia erengatiñu hani lan fulasu ligía. Lun laranserunua turóbuli ligía aba lagúarun lun aban buyei. Aba líchugun aban isubusei lúhaburugun amu eyeri ábati ladouragun lau tau aban gamisa harutu. Murusun dan lárigiñe aba lagumeserun eyeri le uagubei darugu tan gamisa adadagara wiyú ligía lárouga lun. Aba larihin tidoun isubusei aba lagúaragun: ‘Narihiña aban wügüri wéiyaali ayarafadeina! Harutu ladaüragun. Gágubuti, wéiyaali, garubaali, seburaüti giñe leibugun’.

“Layanuhaña luagu náruguti! Siñagua lungua, aba lagúaragun: ‘Anhein mafiñe hubéi luagu le nerengubei, higougu ariha huméi hungua tidan isubusei!’. Úati ganigiti lun ladügüni! Aba lagálumaruni buyei eyeri ligía lau lárani, migisi lumuti árani ligía lau ubanaü luma duna, aba labahichuni luagun, barüinaliani árani ligía lidan aban rida.

“Lídangiñe eyeri le ágüdahabarun isubusei, erengati ‘naruguti’ hani lan wafamilia fulasu. Ariñagati tun nagütü lun lan tábunaguni madiheridunga. Anhatiña le aban familia lun le desidíruabei. Ítara liña laranseruniwa turóbuli ligía.”

 Sügǘ libeina lira komunti Áfürika oksidentali. Ñein, keisi lidan amu burí fulasu ubouagu, afiñetiñu saragu miñunu gürigia aba lan hásügürün hilaaña lidoun ubóu le hani sífirigu, ñéingiñe lubéi gayara lan harihiniñu gürigia ha awinwandubaña Ubouagu ani dagua hagía houngua lidoun habagari. Inarüni san afiñeni le? Inarüni funa san wínwangiña lan hilaaña? Anhein mítaran lubéi, kátaña ha achourubaña luagu hagía lan hanibaña hilaaña sífiri? Súdiniti lasubudiruniwa líricha lóunabagüle álügüdahani burí le. Katei le lánina ibagari odi óunweni.