Inarüni añahein lan sífirigu! Lidan fulasu marihúaditi le ñi habéi sífirigu, añahein sífirigu buítiñu añahein giñe sífirigu wuribatiñu. Gürigia funa san ha wínwanhaña ani hilagua hagía ya Ubouagu sífirigu ha?

Uá; mama hagía. Dan le lounwen somu gürigia, másügürünti lidoun ubóu hani sífirigu, kei hasaminarun bandi. Ida liña wasubudiruni le? Ladüga erenga tani Bíbülia. Bíbülia aban líburu to erengubalin inarüni ani ñübuintu lúmagiñe ábanrügüti Bungiu inarüniti, Heowá líribei. Heowá adügübaliñu gürigia garaüwarügütiñu; ligía subudi lubani buidu ka lan asuseredubei houn dan le hóunwegun. (Sálumu 83:18, Reina-Valera Actualizada, 1989 [RVA]; 2 Timotéu 3:16.)

Erengatu Bíbülia luagu adüga lani Bungiu Adán, le furumiñeti wügüri, “lídangiñe múa”. (Agumesehani [Génesis] 2:7.) Ru lumuti Bungiu lidoun paraísu, fuluri-agei le Edén. Lun hamuga gaganbadi lan Adán lun lilurudun Heowá, móunwenti hamuga; wínwangili hamuga Ubouagu guentó. Gama lumoun dan le ladüraagunbalin Adán lilurudun Bungiu chuñu lau, erengati Bungiu lun: ‘Bagiribuduba bárigoun lidoun múa le aubei badügǘwa, lídangiñe múa badügǘwa basaliraguayaba múame’. (Agumesehani 3:19.)

Ka lilabei le? Haliañein meha san Adán lubaragiñe ladügüni Heowá lídangiñe kaliki le lídanbei múa? Úati meha lidan ni aban fulasu. Mama meha aban sífiri siéluna le magüriahóunwagili. Úagili meha. Ligía, dan le lariñagunbei Heowá ‘lagiribuduba lan Adán lidoun múa’, le labuseerubei lerengun lóunweba lan Adán. Másügürünti Adán lidoun fulasu le hani sífirigu. Danbei le lounwen Adán, ábaya mabagarihali lan, aba úaali lan. Luan ibagari ligía óunwenibei.

Gama lumoun ka gayarabei lerengun hawagu amu gürigia ha hilaañabaña?  Inarüni giñe san úaaña lan? Ru tumuti Bíbülia óunabagülei.

• “Lídounbaña ábanmeme fulasu súngubei [dandu gürigia garaüwarügütiñu kei animaalugu]; lídangiñe múa hadügǘwa súngubei ani lídounyaba giñe múa hagiribuda.” (Apurichihati [Eclesiastés] 3:20.)

• “Ha hilaañabaña ibidiñeti ni kata houn.” (Apurichihati 9:5.)

• “Ñein lagumucha hínsiñehabu, hayereehabu, luma hayumahan.” (Apurichihati 9:6.)

• “Lidan umúahaü, le lunbei ñéinhinba lan badagara, madügǘnti ni kata ñein maritawagún ni kata, úati subudi ni lichú aau ñein.” (Apurichihati 9:10.)

• “Aba hasaliragun [wügüriña] kalikime, ani lídanmeme weyu ligía lagumucha le hasaminarubei hadügün.” (Sálumu 146:4.)

Hérenguti san hun hánharun lun le terengubei Bíbülia lidan bérusu burí le? Anhein ítara liña lubéi, samina huméi le: Lidan saragu familia, tani würi weiriei agañeirubani seinsu lun tameiniruniwa muna. Dan le lounwen, dunguatiñu lufamilia luma lérengunga. Anihein  dan úati seinsu buídürügüti tuma lani weiriou ni hama lirahüñü lun hagañeinhan éigini. Gayarati hadügün láganiñu tani weiriei wuribati houn lufamilia lárigiñe lounwen. Guentó álügüdagua humá hungua: ‘Anhein wínwangili lubéi wügüri ligía lidan ubóu le hani sífirigu, ka úagu masigi lubéi anuriahaña lufamilia? Ka úagu madouragun lubéi hau lufamilia, hawéi gürigia wuribatiñu?’. Ladüga inarüni lan le lerengubei bérusu burí le tídangiñeti Bíbülia. Mabagarihali wügüri ligía; siñati ladügün ni kata. (Sálumu 115:17.)

Mini lan san le, maweiyasundigiaaña lan hilaaña abagarida? Uá; mama ligía lilabei. Eibume wawanserun, wayanuhaba luagu águyuguni lídangiñe óunweni. Gama lumoun, le lilabei katei le, luagu ibidiñe lan houn hilaaña ka lan hadügübei. Siñati harihinün, haganbunün ni hayanuhan huma. Mébunati hanufudedun hawéi. Siñati híderegunün hilaaña ni hadügün dañu hun. (Apurichihati 9:4; Isaíasi 26:14.)