Sun sífirigu ha ladügübaña Heowá buitiñu meha. Ábati laribadun aban ánheli. Ligía Satanásibei le mafia. Busenti yebe meha Satanási lun háhuduragun gürigia ha Ubouagubaña lun, lubaragiñe háhuduragun lun Heowá. Le asigirubei, lafuranguagüdübei le asuseredubei.

Lidan fuluri-agei Edén gíbetu meha tídibu wewe ñein semeburitu tin. Erengati Heowá lun Adán tuma lani weiriou, Ewa, gayara lan héigin tídagiñe furuda burí tuguya lau líbürei. Gama lumoun, erengati Bungiu lun méigin hamá tídagiñe tin tídibu aban wewe. Erengati chóuruti lan hounwen anhaña éiga tídangiñe. (Agumesehani 2:9, 16, 17.)

Aban weyu dan le tábuguarügü tan Ewa, ayanuhatu aban hewe tun. Le linarün aban katei, mama hewe ayanuhaboun tun; Satanási le mafia adügübei, lun genege lan luagu hewe lan ayanuhaboun. Erengati Satanási tun Ewa anhoun lan teiga furuda to uéigiñeboun teweridirua chubei lan tau kei Bungiu. Erengati giñe tun móunweboun lan. Biángubei katei le lariñagubei tun iyeeni. Lau sun lira, afiñetu Ewa lun le lerengubei Satanási aba teigin tídángiñe furuda. Lárigiñe, aba tíchugun tídangiñe lun Adán, ani houti giñe. (Agumesehani 3:1-6.)

Lídangiñe abahüdaguni inarüniti le, furendeitiwa gebedagueiti lan Satanási lun Bungiu yeeti giñe. Erengati tun Ewa móunwenboun lan anhoun maganbadi lun Bungiu. Aban meha iyeeni lira. Hilatu, ligía meme asuseredubei lun Adán. Móunwenti Satanási lidan dan ligía,  lau sun lachülürüba lan dan lun lounwen ladüga lifigoun. Gama lumoun, lau wínwangili lan aniheingua eferidiraguagüdaña gürigia garaüwarügütiña. Yeememegili, ani houchati lun háhalachaguni gürigia lilurudun Bungiu. (Huan 8:44.)

Lárigiñe dan ligía, aba giñe haribadun amu burí ánheligu. Aba harihin ánheligu ha buíduburi hamá würiña ha Ubouagubaña aba habuseerun hagamariduniña. Ligía hayabinbei ya Ubouagu ábati harufudagun houngua lau hágubu wügüriña garaüwarügütiñu. Ábati hanúadahan hádangiñe würiña lun hánigume weiriou. Katei le kóntürati luagu lisuuni Bungiu. (Agumesehani 6:​1, 2; Húdasi 6.)

Barüti giñe katei le lénrengunga houn gürigia garaüwarügütiñu. Aba garahüñü hamá hánigu ánheligu ha weiriou, mítarantiñuti harahüñü kei ha híbiri irahüñü. Aba hawéinamudun kei hígandei hanarimetiñu ani furundetiñu. Eibu lásügürün dan aba labuinchun Ubóu lau anarimeni aba desidirü lan Heowá lagumuchaguagüdüniñu salufuritiñu lidan aban óunwenbu gunran. Noé le richabei hama lufamilia hagíarügüñanu gürigia garaüwarügütiñu ha esefurubaña lídangiñe Gunran. (Agumesehani 6:4, 11; 7:23.)

Gama lumoun, ánheligu ha salufuribaña aba hagiribudun lidoun fulasu hani sífirigu; móunweguntiñu. Aba hasíadiruniwa. Mígirunwatiñu lun hagiribudun lidoun hafamilia ánheligu úaraguatiñu ha lani Bungiu. Aba giñe mígirun laaña lan Heowá lun hayusurun úgubu le hani gürigia garaüwarügütiñu. Lau lásügürün dan hóunweguba lidan  óunwenbu aguseruni. (2 Féduru 2:4; Húdasi 6.)

Lidan lagumeserun wani sígulu ñeiñein meha aban wuribu sielu. Líburu bíbüliku to Arufudúni o Apocalipsis arufuda tumuti le asuseredubei: “Lárigiñe, aba ñein lan aban wuribu sielu, ñein lubéi lageindagua arükánheli Migeli [Hesukrístu lárigiñe láguyugun lídangiñe óunweni] hau lani ánheligu [buítiñu] luma düragón [Satanási]. Ageindaguati düragón hau lani ánheligu [wuribatiñu], aba heferidiruni wuribu; aba mabaraaña lan sielu. Aba lubeiti lasagarún óunwenbu düragón siélugiñe, le binadu hewe ligira le gíribei Mafia, o Satanási, le eyeehabalin sun ubóu. Ligía hau sun lani ánheligu [wuribatiñu], aba hachagarún múarugun”.

Ka san resultóu lanibei le? Abahüdaguni le erengati: “Gundaalá lubeiti sielu, gunda humá huguya le aganóubei ñein”. Ánheligu ha buídubaña gayarati hagundaarun ladüga úaali satanási hama ánheligu o sífirigu wuribatiñu siélu. Ani kaba san asusereda houn gürigia Ubouagu? Erengatu Bíbülia: “Gama lumoun fugiabugu ha aganóubaña ubouagu luma baranaha! Lugundun ñǘdünha Mafia humoun lau óunwenbu igañi, ladüga subudi lumuti luagu murusunrügaali lan lidaani”. (Arufudúni [Apocalipsis] 12:7-9, 12.)

Anha, Satanási hama lánigu paaná salufuritiñu feridiguagüda hamutiñu gürigia ani agubuhatiñu igarigu wéinamuti houn gürigia Ubouagu. Ánheligu salufuritiñu há máfianu lagúahoun houn. Láganiñu Bungiu. Súngubei wuribatiñu.