Erengatu Bíbülia Satanási lan “eyeehabalin sun ubóu”. (Arufudúni 12:9.) Mabuseerunti Satanási hama lumáfianu lun wafiñerun lun le terengubei Lererun Bungiu, to Bíbülia. Houchatiña hadügün lun hafiñerun gürigia luagu wínwangiña lan hilaaña lidan somu fulasu le ñein habéi sífirigu. Ariha waméi ida liña lan hadügüni.

Gíbeti relihión arufudahati anuhein lan aban uani hadan sun gürigia garaüwarügütiñu aba lan tásügürün lidoun fulasu le hani sífirigu lárigiñe lounwen úgubu. Erengatiñu hilati lan úgubu, ani móunwen tan uani. Chóurutiñu giñe siñati lan tounwen uani, ladüga móunwedadi tan.

Ani marufudahan tumuti Lererun Bungiu le. Arufuda tumuti Bíbülia gürigia guánarügü lan uanibei, mama somu katei lidan aban gürigia. Kéisigubeirügü, dan le tadimurehan Bíbülia luagu ida liña lan ladügǘn Adán, erengatu: “Ábati ladügüni Wabureme Bungiu wügüri lídangiñe múa, aba líchugun ibagari lun, lau láfurun lígirugun. Ítara liña liabin wügüri lun gabari lan [“aban lan uani wínwantu”, 1 Korintuna 15:45, RVA]” (Agumesehani 2:7.) Ítara liñati michugúntu aban uani lun Adán; ligía meha uanibei.

Kei gürigia guánarügü lan lilabei  dimurei bíbüliku “uani”, moun lumuti yebe taweiridun wanigi dan le lariñawagun woun luagu gayara lan tounwen uani ani hilatu. Ariha huméi le terengubei Lererun Bungiu lidan le asigirubei.

• “Uani to afigouhatu, tuguyaba ounwe.” (Esekiéli 18:4, RVA.)

• “Ladüga mígirun bubadina lidan umúahaü, mígirunbadibu lun tañaladun nuani húyurugu!” (Sálumu 16:10.)

• “Subudi huméi luagu furumiñeguarügü lan agiribudagüdüti le afigouhabei lídangiñe luriban lémeri, lasalbaruboun lan luani luéi óunweni, ani ferudunagüdaléime sun lifigoun.” (Santiagu 5:20.)

Amu bérusu tidan Bíbülia arufudati gayara lan tagumuchaguagüdünua uani (Arufudúni 20:4), áfaruatu (Arufudúni 6:9), dan le ladüraawagun tawaragun (Hobu 7:15, RVA). Kei le aubei larihua, hilatu uani.

Aliiha humoun Bíbülia lúmagiñe tagumeseha dagá lumoun tagumuhóun líburu ani maweiyasunbadün adeirei dimurei “uani móunwedaditu”. Mama sífiri uani. Arufudahani luagu móunwedadi tan uani mama aban arufudahani tídangiñeti Bíbülia. Aban arufudahani lani Satanási hama lumáfianu. Iyeereguti sun iyeeni tani relihión lun Heowá. (Ariñawagúni 6:16-19; 1 Timotéu 4:1, 2.)

Féridiguagüda lumutiña giñe Satanási gürigia hau buyei. Aban buyei ligía aban gürigia le gayarabei laresibirun uganu lídangiñe ubóu hani sífirigu. Gíbetiñu gürigia íbini buyei, afiñetiñu ñübuin lan uganu ligía hámagiñe sífirigu hani hilaaña. Ani, kei tarufuduni Bibülia, siñati lasuseredun katei le. (Apurichihati 9:5, 6, 10.)

Kati úmagiñe liabin uganu burí le? Hámagiñe máfianu! Gayarati hariaguni máfianu somu gürigia dan le wínwangili; tenitiña lun ida liña lan meha layanuhan, lariyawagunua, le ladügübei, luma meha le lasubudirubei. Ligíati ménrengun lubéi houn háyeihaniñu gürigia ha hilaañabaña. (1 Samueli 28:3-19.)

Awansegüda lumuti Satanási iyeeni hawaguti hilaaña lau úraga iyeeniti. Súnwandan disegüdalaniñu úraga burí le gürigia luéi inarüni le tídanbei Bíbülia. (2 Timotéu 4:4.)

Áfürika aganbahouati úraga hawagu gürigia ha arihúbaña wínwanñu lárigiñe hóunwen. Súnwandan ariha hamani gürigia lidan somu fulasu díseti luéi meha ñi lubéi leredera. Gama lumoun, álügüdagua humá hungua: ‘Anhein hamuga gayara lagiribudun somu gürigia hádangiñe hilaaña lagiribuduña hamuga san lidoun aban fulasu dise hawéi lufamilia hama lumadagu?’.

Siñati hamuga san arihuarügü lan aban gürigia lenege le óunwebei? Ariha waméi hénpulu le, biama minisi kristiánugu ha apurichihabaña lidan aban aüdü, aba harihin nihán lan aban gürigia wéiyaali asigiraña luagu fiú oura. Dan le hálügüdüni ka lan uagu lasigiraña, aba híchugun fe luagu samina lan wéiyaali ligía luagu líbiri lan aban hádangiñe minisi ha, le hilaalibei fiú irumu lubaragiñe dan ligía. Bulieíguati, ani mabuseerunti lafiñerun ítara liña lan. Egesiha huméi ka lan labahüdagubei wéiyaali ligía houn lumadagu hama lubesinanigu lárigiñe le asuseredubei!

Gayarati subudi humá luagu burí katei ámuti le harihubei gürigia, le haganbubei o le gewenedü habéi. Sügǘ libeina lira le siñati gufurandawa lan adügati lun hanufudedagun ha unbaña lasusereda. Marein, to meha erederuboun lidan aban fulasu Áfürika oksidentali, súnwandan taganbuni tumalali tagütü to hilaaruboun agúaha tun áriebu. Lau lanarime anufudei, abaha tagúarahan saragüda tumutiñu tiha sun tufamilia. Lau lasügürün dan aba lálülüdün tau.

Lun hamugati inarüni lan wínwangiña lan hilaaña, richati hamuga san hanufudehaniñu haduheñu ha hinsiñebaña houn? Uá. Uganu burí wuribati le, hámagiñe máfianu liabin.

Ani kábati erengua luagu uganu le genegeti huubei lan ani ruti dügüdaguaü? Ariha wamá aban hénpulu, dan meha sánditubei Gbassay Sierra Leonana, aba gewenedü tan lachülaagun túguchi le hilaalibei tun. Aba lerengun tun lun tidin átügüra aban ubanaü tuéigiñe tídibu aban wewe, lárigiñe lun lan tamigisiruni lau duna ani gurateime. Moun lumuti lan tadimurehan ni ka uma lubaragiñe tadügüni. Adüga tumuti kei aubei lerenga tun, aba tareidagun.

Erengatu amu gürigia chülüguati lan tani weiriei le hilaali tun, aban áriebu. Erengatu buidu lan larihin ani wénde tan daüguaü to luaguboun.

 Uganu burí le luma arufudúni, kamá hamuga huuti buidu ligía. Lúmagiñe san Bungiu liabin? Uá; mama lúmagiñe. Heowá ligía “Lubungiute inarüni”. (Sálumu 31:5.) Maweiyasunti eyeedawa. Máfianurügüñanu adügei le.

Gama lumoun, añahein funa san máfianu buítiñu? Uá. Lau sun anihein lan dan harufudagun houngua kamá hamuga ídehatiñu, wuribatiñu súngubei. Dan le layanuhanbei mafia tuma Ewa, genegeti yebe gayara lan gamadawa lan. (Agumesehani 3:1.) Gama lumoun ka san resultóu tanibei lárigiñe taganbuni ani adügatei le lerengubei? Hilatu.

Subuditi hun luagu ménrengun lan larufudagun aban gürigia wuribati lungua kamá gamadounti hama gürigia ha labuseerubaña lamañourun odi lagidarun somu katei hawéi. “Ari haruti, anigi wuritu”, liña aban ariñawagúni áfürikana. Ani erengatu Lererun Bungiu: “arufudaguati Mafia guánarügü lungua kei ánheli le íchugubalin larugounga”. (2 Korintuna 11:14.)

Mayanuhan haali Bungiu hama gürigia Ubouagu lidan uénedü, arufudúni ni burí umalali lídangiñe ubóu hani sífirigu. Adundeha lumutiña gürigia arufudaha ligía houn tau Bíbülia, to gayaraboun tadügün “lun aranseñu hamá lubúeingu Bungiu lun hadügün sun luwuyeri wadagimanu buiti”. (2 Timotéu 3:17.)

Ítarati, dan le leweridiruniwa Heowá tuéi lisádaran mafia ladügünbalin ladüga hínsiñe wamá lun. Subudi lumuti áganiñu lan peligurutiñu máfianu.