Gama lumoun ka uagu lanarimebei láfaagun Satanási hama lumáfianu lun hamañounruniña gürigia? Ladüga busentiñu lun wúaradun hama lidan hebedaagun. Busentiñu lun wáhuduragun houn. Busentiñu giñe lun wafiñerun lun hayeeni ani adüga waméime katei burí le mínsiñebei lun Heowá. Gíbeti lídangiñe burí igaburi le, úarati luma échuni le hawaguti hilaaña.

Dan le lounwen aban waduhe le hínsiñetimaabei woun lamiselu le gáriti tun wanigi, ani úati ni kata wuribati lun warufuduni wagarigu. Lárigiñe lounwen lumada Hesusu, le gíribei Lásaru, “aba layahun”. (Huan 11:35.)

Anihein besafu échuni hawaguti hilaaña, ani ámuñegueinarügüti lidan sun ubóu. Gíbeti lídangiñe úati kóntüra lan luagu tagumadihan Bíbülia. Gama lumoun, saminaü luagu añaheingua lan hilaaña wínwanñu ligía lébunabei fiú lídangiñe burí échuni le, ani gayara lan giñe harihiniñu gürigia ha nibagaribaña. Beluria, igarigu le manibei furenu luma lanarime aransehani lubá ábunahani, anufudei lébunabei sun burí katei le luéi hagañidun hani hilaaña sífiri. Kei le ha hilaañabaña “ibidiñeti ni kata houn”, ha adügübani katei burí le hawanseragüdüñen liyeeni Satanási. (Apurichihati 9:5.)

Amu burí échuni le ñübuinti lídangiñe afiñeni luagu mégei hama  hilaaña ídemuei hámagiñe ha wínwangiñabaña ani ánhaña lan mámalihan hamá hadügüba lan dañu houn. Lidan fiú ageiraü adügatiñu bankete luma sákürifisiu 9 weyu, 40 weyu o aban irumu lárigiñe lounwen somu gürigia. Afiñetiñu líderagubei lan sun burí katei le hilaali lun ‘lánhiñuragun’ lóubawagun fulasu le ñein habéi sífirigu. Ladagaragüdünua éigini luma uniñein houn hilaaña ligía amu échuni kamaniti.

Sun burí échuni le wuribati ladüga lawanseragüdüñein liyeeni Satanási hawagu hilaaña. Lánharuña hamuga san Heowá lun wúaradun luma échuni le lébunabei harufudahan máfianu? Maweiyasunti! (2 Korintuna 6:14-18.)

Ha lubueingu Bungiu le inarüniti uáti gádan laniñu échuni le íderagubalin liyeeni Satanási. Lubaragiñe lira, áfaaguatiñu lau ínsiñeni lun híderaguniñu ani ru hagía gurasu houn ha wínwangiñabaña. Subudi hamuti, luagu dan lan le hilaali somu gürigia, Heowá rügüñein gayara líderaguni. (Hobu 14:14, 15.)

Fiú gürigia ayanuhatiña hama máfianu o yusutiña buyei. Wawati lun le abiñarahani. Vudú, abiñaraguni, ariaahani, lariñawagun katei le lunbei lasuseredun, luma halügüdün hilaaña sun burí luwuyeri échuni le lánina abiñarahani.

Asíadira tumuti Bíbülia échuni le dan le terengun: “Ualá ni aban hídangiñe [...] maríaagüdün huguyame, málugun huguyame hariñaguni katei le lunbei lasuseredun, mabiñarahan huguyame, [...] málügüdahan huguyame hama garíaahatiña, ni hama búyeigu, ni hama hilaaña. Lugundun mínsiñetiña ha adügübaña katei líbeina le lun Bungiu”. (2 Lúrudu [Deuteronomio] 18:10-12.)

Ka uagu lerebei lewéridiruniwa Heowá luéi burí échuni le?

Wéridi lumutiwa Heowá luéi sun luwuyeri abiñarahani lun wabuidun gúanarügü. Hínsiñehabuti teniti giñe houn gürigia, ani subudi lumuti luagu ha lan óundarubaña hama máfianu gumutiñu lau súfuri.

 Nilda aban hádangiñe gürigia hagía, buyei meha Brasili. Adügatiñu máfianu lun labuinchun tibagari lau bandi idiheri. Erengatu: “Sífirigu [...] ragühamutina meha, gumadi hamutina. Anihein burí dan subudigua nan nungua ani anihein dan ibidiñegua nan nungua, aba nanügǘn háspitalirugun ladüga lasandirun nichügü. Hanarimeti héibaahanina máfianu hagía dei lun hasandiragüdünina lídangiñe nani nérübiu. Guratina arani lun darangilu nan ani ábati natatirun ataguá  luma agumulaha gabügürügua. Saragu irumu nau ítara”.

Lárigiñe, lau lídehan Heowá hama lánigu Gefentiña Ubouagu, aba tesefurun Nilda luéi habafu máfianu ani guentó wínwantu aban lubuidun ibagari. Erengatu: “Weridinumutün lun maweiyasun humá, ni luágu murusun oura, aganida ni kata hama sífirigu [wuribatiñu]”.