Amisuraha lumutiña Bungiu sun hawuyeri gürigia lun hayarafadun lun lidan furíei (Sálumu 65:2). Gama lumoun, marufudunti le aganba lani Bungiu sun furíei. Ariñagatu Bíbülia gayarati lan maganbun lani Heowá lafurieidun aban wügüri maríeiti anhein eredera óuseroun lúmari wuriba (1 Féduru 3:7). Dan meha le herederun ísüraelina adaagua katei wuribati, aba meha maganbun lániña Bungiu. Gama lumoun, íbini adüga lan aban gürigia figóu burí le wéinamuti, anhein asaküriha aganba lumuti Bungiu lafurieidun. Aliiha huméi Isaíasi 1:15 luma 55:7.

Ariha huméi bidéu: Aganba lumuti san Bungiu sun furíei?

Furíei, ligía aban fánreinti lidan wáhuduragun lun Heowá, ligía lúnrügüba lubéi wafurieida (Matéu 4:10; 6:9). Ani kei gafigoun wabéi mosu wafurieidun lidan liri Hesusu, lugundun ligía óunwebei luagu wafigoun (Huan 14:6). Mabusenrunti Heowá lun wáguyuguagüdüni ábanmeme furíei le furendei wamaali o le bürüwañubei tidan somu gárada, busenti lun wafurieidun tídangiñe sun wanigi. Aliiha huméi Matéu 6:7 luma Filipuna 4:6, 7.

Aganba lumuti Wabungiute íbini furíei le wadügübei maniñu (1 Samueli 1:12, 13). Amisuraha lumutiwa giñe lun wafurieidun lun furumiñeguarügü oura, binaafin, guñoun, lidan lóurate weigin o dan le lídanñadiwa lan somu turóbuli. Aliiha huméi Sálumu 55:22 luma Matéu 15:36.

Uguñe weyu güreweiti werederun yarafa lun Bungiu lugundun wawinwanduña haganagua gürigia ha mafiñenbaña luagu, ani adügatiña bula lau füramasei le ladügübei luagu ñeinbei lan darangilaü lidan sun Ubóu. (2 Timotéu 3:1, 4;  2 Féduru 3:3, 13). Ligíati megei wabéi wadamuridagun hama wíbirigu lun wibihin ani ru wagíame dǘgüdaguaü. Aliiha huméi Ebüréu 10:24, 25.

Dan le wóundarun hama gürigia ha hínsiñehabubaña lun Bungiu, íderagua lumutiwa lun werederun yarafa lun. Ruti hadamuridagun gefentiña luagu Heowá chansi woun lun wasagarun buiti lídangiñe hafiñen amu. Aliiha huméi Rómana 1:11, 12.

Hayarafaduba lun Bungiu ánhadün asaminara luagu le hafurendeirubei luagu tidan Bíbülia. Samina humá luagu le ladügübei, luagu ladundehan luma luagu lani füramasei. Ánhadün asaminara ani furíei hugía lun Bungiu, líderagubadün lira lun gunfuranda humani luéirigun, línsiñehabu luma lichú lau. Aliiha huméi Hosué 1:8 luma Sálumu 1:1-3.

Hayarafaduba lun Bungiu ánhaüngubeirügü afiñera luagu tau sun hanigi. Gama lumoun, ítara liña afiñeni kei aban tídibu wewe. Ítara kei megei lan tídibu wewe duna lun lawinwandun, mégeitiwa giñe wederebudagüdüni wafiñen lau wasaminarun hulili luagu ka lan lébunabei wafiñen. Aliiha huméi Matéu 4:4 luma Ebüréu 11:1, 6.

Bereseti Heowá hau ha hínsiñehabubaña lun. Gabafuti lun lóunigiruniña luéi furumiñeguarügü katei le gayarati ladügün lun heferidiruni hafiñen luma hemenigin luagu ibagari magumuchaditi (Sálumu 91:1, 2, 7-10). Wéridi lumutiña luéi igaburi le gayarati ladügün lun hasandirun o lun heferidiruni hagundan, arufudahati giñe houn ida luba lan buídutima lan habagari. Aliiha huméi Sálumu 73:27, 28 luma Santiagu 4:4, 8.