Heowá, Bungiu le gúndaabei le úmagiñebei liabin saragu uganu buiti, busenti lun gunda hamá iduheñu (1 Timotéu 1:11, TNM). Ligía adügübalin maríei. Dan le hamarieidun gürigia gúndaatiña kei familia ani adügati lun buídutima lan hagüriahaniña hasaanigu. Adügaaña gumadimatiña lúrudu burí lun labürüdǘniwa maríei, ani mosu gaganbadi hamá kristiánugu lun burí lúrudu ligía. Aliiha huméi Lúkasi 2:1, 4, 5.

Ariha lumuti Bungiu maríei keisi lóundarun aban wügüri tuma aban würi lun súnwandan. Busenti Heowá lun úaragua lan gürigia maríeiti tun lani weiriou ani úaragua tuguyame lun (Ebüréu 13:4). Iyereeguti ígiraguni lun Heowá (Malakíasi 2:16). Gama lumoun, ígirati lun hígiragun gürigia ani lun hamarieidunya dan le lagabarahan aban hádangiñe. Aliiha huméi Matéu 19:3-6, 9.

Adüga lumuti Bungiu wügüri tuma würi lun híderagun houngua lidan maríei (Agumesehani 2:18). Wügüri maríeiti lichügüdinabei familia, ligíati mosu lubéi lagunfuliruni lani buligasion lun lanuriahaniña lufamilian luma lun larufudahan houn luagu Bungiu. Mosu giñe aranseñu lan lun ladügün sákürifisiu ladüga tínsiñe lani weiriou lun. Mosu hínsiñegua hamá maríeitiña hámagua ani ñein ligíame inebesei hadan. Kei biángubei lubéi hagía charatiña, mosu giñe hafurendeirun lun ferudunagua hamá houngua lun gayara lan gunda hamá. Aliiha huméi Éfesuna 4:31, 32; 5:22-25, 33 luma 1 Féduru 3:7.

Anhein gaturobulin habéi gürigia maríeitiña hámagua, mosu háfaagun lun hóuseragun houngua lau ínsiñeni (1 Korintuna 13:4, 5). Mariñaguntu Lererun Bungiu lun lan hafanreinragun  gürigia maríeitiña kamá aban manera lun haransehani turóbuli le asusereduti lidan habagari kei maríeitiña. Aliiha huméi 1 Korintuna 7:10-13.

Busenti Heowá lun gunda hamá isaanigu. Ligía larufudahanbalin houn ida luba lan hagundaarun lau nibureingiña lan. Busenti lun hafurendeirun lídangiñe lichú aau luma subudi le hawagubei hagübürigu (Kolosana 3:20). Busenti giñe Heowá lun hasandiruni ugundani le lanügübei leseriwidúniwa lun luma lun Liráü. Aliiha huméi Apurichihati 11:9–12:1; Matéu 19:13-15, luma 21:15, 16.

Mosu háfaagun agübürigu lun híchugun éigini, muna tuma daüguaü houn hasaanigu (1 Timotéu 5:8). Gama lumoun, mosu giñe harufudahan houn lun hínsiñe lan Bungiu houn ani áyeiha hameime (Éfesuna 6:4). Dan le hínsiñe lan Bungiu houn agübürigu rútiña aban buiti hénpulu houn hasaanigu ani gániti le aban buiti efekütu hawagu. Dan le harufudahan houn tídangiñe Lererun Bungiu, gayarati hadügün lun hasaminarun buidu luma lun buidu lan hagaburi. Aliiha huméi 2 Lúrudu 6:4-7 luma Ariñawagúni 22:6.

Mégeitiña isaanigu lichugún dǘgüdaguaü houn, ani dan le hadügün somu katei buiti mosu lariñawagún houn buidu lan hadüga. Aniheinbei giñe dan megei hamá heweridirún lun méiguadun hamá lidoun somu katei peliguruti (Ariñawagúni 22:15). Gama lumoun, moun lumuti habeichuniña lau igañi ni lau furundei. Aliiha huméi Kolosana 3:21.

Adügaaña gefentiña luagu Heowá saragu líburu lun híderaguniña agübürigu hama isaanigu, ani sun líburu tuguya, Bíbülia tébunaboun. Aliiha huméi Sálumu 19:7, 11.