Lubaragiñe lágurahoun Hesusu ya ubouagu keisi gürigia, wínwanti sielu kei sífiri. Adügati le lun amu lan hawéi ha híbiri gürigia (Huan 8:23). Lubaragiñe ladügün Heowá furumiñeguarügü katei, adüga lumuti Hesusu ani ídehati Hesusu lidan ladügǘn sun le líbiri katei. Wáwati lun tidan Bíbülia Liráü Bungiu le “ábanrügüti” ladüga ligíarügüñein lan ladügün Bungiu lábuguarügü sin ídemuei (Huan 1:14). Subudiwati giñe kei ‘Dimurei’, lugundun ayanuhati meha lidan liri Lúguchi. Aliiha huméi Ariñawagúni 8:22, 23, 30 luma Kolosana 1:15, 16.

Óunaha lumuti Bungiu Liráü ubouagun. Aba lásügüragüdüni libagari turageirugun María, aban meha nibureintu huríu to gañüngiru. Ligíati, máguchiti meha Hesusu aban wügüri ubouagu (Lúkasi 1:30-35). Ǘrüwañein lébuna liabin Hesusu ubouagun: 1) lun larufudahani inarüni luagu Bungiu, 2) lun larufudahan woun lau lani hénpulu lun wadügüni lugundan Bungiu íbini lidan lénrengunga, luma 3) lun líchuguni libagari sin figóu “lebegime hasalbarun saragu”. Aliiha huméi Matéu 20:28.

Lebegi asalbaruni mini lan ebegi le afayeirúbei lun lesefurúniwa libagari aban gürigia (Áfuriduni 21:29, 30). Ni óunweni ni aweiyaduni úati meha lidan lisuuni Bungiu houn gürigia. Subudi wamuti le, lugundun wéridi lumuti Heowá Adán anhein lan buga afigouha lóunweba lan. Ligíati, lun hamuga  mafigouhanti móunwenbei yebe (Agumesehani 2:16, 17; 5:5). Ariñagatu Bíbülia lídangiñe lan Adán “lebelura” óunweni ubouagun. Lidan amu dimurei, aba lásügüragüdüni Adán figóu hawagun sun ladügawagun, ítara liña lasiadiruniña lun óunweni. Ligía megei wabéi lafayeirún lebegi wasalbarun. Aliiha huméi Rómana 5:12 luma 6:23.

Kati buga gayarabei lafayeiruni lebegi asalbaruni lun lesefuruniwa lídangiñe óunweni? Fayei wamuti wafigoun dan le wounwen. Gama lumoun kei gafigoun wabéi, siñati wafayeihan luagu hafigoun amu gürigia. Aliiha huméi Sálumu 49:7-9.

Mama lau figóu lágurahoua Hesusu kei wagía ani mafigouhanti ni aban wéiyaasu. Móunwenti lubeiti luagu lifigoun, hilati lun lafayeiruni hafigoun sun gürigia. Arufuda lumuti Bungiu lueirin hínsiñe gürigia lun lau lóunahani Liráü lun lounwen luagu wafigoun. Arufuda lumuti giñe Hesusu hínsiñe wamá lun lau gaganbadi lan lun Lúguchi, aba líchuguni libagari lun lesefuruniwa lídangiñe figóu. Aliiha huméi Huan 3:16 luma Rómana 5:18, 19.

Ariha huméi bidéu: Ka uagu lounwe Hesusu?

Dan le ya lubéi Hesusu ubouagu, areidaguagüdati sánditiña, saragüdati hilaaña ani íderagua lumutiña ha asufurirubaña, ítara arufuda lumuti le lunbei ladügüni ámuñegü hawagu lubúeingu Bungiu ha úaraguatiña (Matéu 15:30, 31; Huan 5:28). Lárigiñe lounwen Hesusu, águyuguagüda lumuti Bungiu lun lawinwandun sielu (Éfesuna 1:20). Lárigiñe, aba lagurabahan Hesusu luéigiñe lóunwenren Lúguchi darí líchugun ubafu lun lun larúeihani sun Ubóu (Ebüréu 10:12, 13). Uguñe weyu larúeihaña Hesusu sielu ani hapurichihañein lani disipulugu uganu buiti le lidan sun ubóu. Aliiha huméi Danieli 7:13, 14 luma Matéu 24:14.

Málühali Urúei gabafuti le agumucha hau gürigia wuribatiña luma lau asufuriruni le hanügübei. Sun ha afiñebaña luagu Hesusu ani gaganbadi hagía lun, hawinwanduba lidan ugundani ubouagu danme le paraísuhali. Aliiha huméi Sálumu 37:9-11.