Bungiu adügübalin sun katei. Aniheingubeiñein Bungiu ani lawinwanduba lun súnwandan (Sálumu 90:2). Lúmagiñe liabin uganu buiti le tídanbei Bíbülia (1 Timotéu 1:11). Kei ligía lubéi íchugubalin ibagari woun, mosu lúnrügüba lan weseriwida. Aliiha huméi Arufudúni 4:11.

Úagili ni aban gürigia ubouagu arihiti Bungiu, lugundun sífiri ligía, aban luwuyeri ibagari le íñugutimati sügǘ lau habagari gürigia ha láutiña ǘgürügü luma abun (Huan 1:18; 4:24). Gama lumoun, gayarati wasubudiruni ka lan ligaburibei Bungiu dan le wakutihani sun le adüga láalibei. Kéiburi sun tuwuyeri furuda luma fuluri le ladügübei arufudahati woun hínsiñe wamá lun ani weiri lan lichú lau. Ani dan le warihini lueirin ubóu arufudahati woun weiri lan lubafu Bungiu. Aliiha huméi Rómana 1:20.

Gayarati giñe wasubudiruni Bungiu dan le waliihanu Bíbülia. Ayanuhatu woun luagu ida liña lan lóuseruniña gürigia, ka lan katei hínsiñebei lun luma le mínsiñebei lun, luma ida liña lan lóunabun lidan ámuñegueinarügü kesi. Aliiha huméi Sálumu 103:7-10.

Ariñagati meha Hesusu: “Wáguchi Bungiu le siélubei, inebewalá biri” (Matéu 6:9). Íbini anihein lan ámuñegueinarügü dimurei le ayusurúbei lun wayanuhan luagu Bungiu, ábanrügüñein liri. Lidan kada iñeñein iridúati liri Bungiu lidan ámuñegueinarügü manera. Lidan garifuna Heowá liña liridún. Ariñagatu Bíbülia luagu Bungiu: “Lun hasubudiruni gürigia Heowá lan bíribei, buguyarügüñein le Íñugutimabei ligibuagu sun ubóu” (Sálumu 83:18, TNM). Ani lidan Arufudúni 19:6 dariwati dimurei “Alelúya”, mini lan dimurei le, Alawaha huméi Heowá.

 Gidawati liri Bungiu tídangiñe besafu Bíbülia ani leweñegua aba hayusurun dimurei kéiburi Bungiu o Aburemei. Gama lumoun, lidan iñeñein le ídanbei tabürüdǘwa Bíbülia furumiñe dariwati meha liri Bungiu kéiburi sedü-milu wéiyaasu. Arufudaha lumuti Hesusu inarüni houn gürigia luagu Bungiu, íbini liri. Aliiha huméi Huan 17:26.

Ariha huméi bidéu: Gíriti san Bungiu?

Anhein inarüni lubéi hínsiñe wamá lun Heowá, ka uagu lígira lun ñein lan saragu asufuriruni? Añahein gürigia saminatiña súfurigüda lumutiwa lan Bungiu lun lóuchaguniwa. Ani iyeeni lira. Aliiha huméi Santiagu 1:13.

Ígira lumutiwa Heowá lun desidírü wamá kaba lan üma wárügüda lidan wabagari. Ani buítimati hamuga wayusuruni chansi ligía lun weseriwidun lun (Hosué 24:15). Gama lumoun, gíbetiña gürigia ayusuruti chansi le lun hadügün katei wuribati, ligía líbebei asufuriruni ubouagu. Gama lumoun, híruti Heowá lau larihin saragu marichaü. Aliiha huméi Agumesehani 6:5, 6.

Kei le hínsiñe wabéi lun Heowá ani busenti lun wagundaarun lidan wabagari, málühali agumucha lau igarigu luma wuribani. Gama lumoun, gániti Heowá resun buiti lun lígirun lun ñein lan asufuriruni. Lidan leksióun 8 lafuranguagüdüwaba resun burí ligía. Aliiha huméi 2 Féduru 2:9 luma 3:7, 13.

Ruti Heowá chansi woun lun wayarafadun lun lidan furíei. Bereseti lau kada aban wádangiñe (Sálumu 65:2; 145:18). Aranseñu liña giñe lun feruduna lániwa ani ariha lumuti wáfaagun lun wadügüni lugundan, íbini anihein lan dan wachararun. Ligíati, íbini gafigoun wamá, gayarati lumadagu wamá. Aliiha huméi Sálumu 103:12-14 luma Santiagu 4:8.

Kei Bungiu lubéi íchugubalin ibagari woun, lunti línsiñedun woun sügǘ lau furumiñeguarügü gürigia (Márükosu 12:30). Arufuda wamuti hínsiñe lan woun dan le wafurendeirun luagu luma dan le wadügüni lugundan. Dan le wadügüni ítara, derebugugüda wamuti wamadagua luma. Aliiha huméi 1 Timotéu 2:4 luma 1 Huan 5:3.