ARUFUDAHANI 04
Ariñaga tumuti Bíbülia woun ka lan Búngiubei
Lau sun hudugua hamá gürigia houn ámuñegueinarügü búngiugu lúmagiñe furumiñeti dan, ariñagatu Bíbülia anihein lan aban Bungiu le “wéiritimati [...] hawéi sun búngiugu” (2 Krónikasi 2:5). Katei san Bungiu ligía? Ani ka adügübei lun wéiritima lan hawéi sun búngiugu ha únbaña háhuduragua gürigia? Lidan arufudahani le, hafurendeirubei le labusenrubei Bungiu lun hasubudiruni luagu.
1. Ka líribei Bungiu ani ida liña wasubudiruni busén lan lun wasubudiruni liri?
Arufudaguati Bungiu lungua woun tidan Lererun. Ariñagati: “Au Heowabei, ligía níribei” (Isaíasi 42:5, 8, TNM). “Heowá” ligía ligaburibei lásügürawagüdün aban iri ebüréu ani según saragu sásaamu, “Adügati lun Lasuseredun” mini lubéi. Busenti Heowá lun wasubudiruni liri (Áfuriduni 3:15, TNM). Ida liña wasubudiruni? Ladüga adügati lun láfuachun liri tidan Bíbülia lóugiñe 7,000 wéiyaasu! a Heowá líribei “Bungiu le inarünibei dandu sielu kei ubouagu” (2 Lúrudu 4:39, TNM).
2. Ka tariñagubei Bíbülia woun luagu Heowá?
Ariñagatu Bíbülia Heowarügüñein lan Bungiu inarüniti hádangiñe sun búngiugu ha únbaña háhuduragua gürigia. Ka uagu? Ladüga Heowá lan Bungiu “le Íñutimabei ligibuagu sun Ubóu” (Sálumu 83:18). Lúnrügüñein tagúara Bíbülia “Bungiu, le Suntigabafu”, ladüga ligíarügüñein lan gabafu lun ladügüni sun le labusenrubei. Ligía giñe “adügübalin sun katei”, Ubóu hama sun gabagaritiña ha lídanbaña (Arufudúni 4:8, 11). Gabagarigubeiñein Heowá ani labagariduba lun súnwandan, úati amu Bungiu kei ligía (Sálumu 90:2).
SIGÍ HUMÁ AFURENDEIRA
Ariha waméi ida liña lan amu lan liri Bungiu luéi ligaburi hagúahan gürigia lun. Wafurendeirubei giñe ida liña lan lasubudiragüdüni liri woun luma ka lan uagu labusenra lun wasubudiruni.
3. Lau sun gibe lan ligaburi laguarún lun Bungiu, ábanrügüñein liri
Lun warihini ida liña lan amu lan liri aban gürigia luéi ligaburi laguarún lun, ariha huméi BIDÉU, ábameti hayanuhan luagu álügüdahani le.
-
Ida liña amu lan aban iri luéi aban ligaburi agúaruni, kéiburi aburemei?
Ariñagatu Bíbülia hudugua hamá gürigia houn saragu búngiugu hama aburemeigu. Aliiha huméi Sálumu 136:1-3, ábameti hayanuhan luagu álügüdahani le:
-
Ka un laguarúa “Habungiute búngiugu” ani “Habureme aburemeigu”?
4. Busenti Heowá lun hasubudiruni liri ani yusu humeime
Ida liña wasubudiruni busén lan Heowá lun hasubudiruni liri? Ariha huméi BIDÉU, ábameti hayanuhan luagu álügüdahani le:
-
Ka funa san uagu busén lubéi Heowá lun lasubudirúniwa liri?
Busenti Heowá lun hayusuruni gürigia liri. Ariñagatu Bíbülia: “Sun ha agúaruti liri Heowá, hasalbaruba” (Rómana 10:13, TNM). Guentó, ayanuha humá luagu álügüdahani burí le:
-
Ka uagu buidu lubéi wayusuruni liri Bungiu, Heowá?
-
Ida liña san hasandiragun hungua dan le laguarúniwa hun lau hiri?
-
Ida liña funa san lasandiragun Heowá lungua dan le hayusuruni liri?
5. Busenti Heowá lun lumada humá
Ariñagatu aban kanboyana gíritu Soten tafurendeiruni lan liri Bungiu adügübei lun tasandiruni ugundani le wéiritimabei lidan tibagari. Ariha huméi BIDÉU, ábameti hayanuhan luagu álügüdahani le:
-
Según le arihíbei lidan bidéu, ida liña tasandiragun Soten tungua dan le tasubudirunbalin liri Bungiu?
Liibe-agei dan, lun gamadagua wamá luma aban gürigia, furumiñe mosu wasubudiruni liri. Aliiha huméi Santiagu 4:8a, ábameti hayanuhan luagu álügüdahani burí le:
-
Ka labusenrubei Heowá lun hadügüni?
-
Afiñetün san hayarafaduba lan lun Bungiu anhein hasubudira liri ani yusu humeime? Ka uagu?
LE HARIÑAGUBEI FIU GÜRIGIA: “Kei ábanrügüñein lubéi Bungiu, gayaraati wagúarun lun kei auti wabusenra”.
-
Afiñetün san Heowá lan líribei Bungiu?
-
Ida luba hamuga san hafuranguagüdüni houn amu busén lan Bungiu lun wayusuruni liri?
LE HAFURENDEIRUBEI
Heowá líribei Bungiu le inarünibei. Busenti lun wasubudiruni liri ani yusu wameime lun gayara lan lumadagu wamá.
Águyuguagüdüni
-
Ka adügübei lun amu lan Heowá hawéi búngiugu ha únbaña háhuduragua gürigia?
-
Ka uagu lunti lubéi wayusuruni liri Bungiu?
-
Ka katei arufudubei busén lan Heowá lun gamadagua humá luma?
FURENDEI HUMÁ LANWOUN
Akutiha humá seingü katei le arufudubalin anihein lan Bungiu.
“Le san lúgubu anihein lan Bungiu?” (Ariñahani lídangiñeti jw.org)
Ariha huméi ka lan uagu gayara lubéi lafiñerúniwa aniheingubeiñein lan Bungiu.
“Ka san adügübalin Bungiu?” (Garüdia Awisahatu, to lánina 1 lidan widü-hati, irumu 2014)
Ariha huméi ka lan uagu lunti lubéi wayusuruni liri Bungiu íbini ibidiñe lan woun ida liña lan meha liridúniwa.
Súdiniti san ida liña lan wagúarun lun Bungiu? Ariha huméi ka lan uagu wariñaga ábanrügüñein lan liri Bungiu.
a Tidan garüdia Adundehani lun taturiahóun Lererun Bungiu páhina 1 darí 5 hadariruba lanwoun ariñahani luagu le mini lubéi liri Bungiu luma ka lan uagu máfuachun lubéi iri le tidan fiu Bíbülia.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
