ARUFUDAHANI 05
Tídanñein Bíbülia luganute Bungiu woun
Rúhali Heowá aban lubuidun idewesei woun: 66 líburu to tídanboun Bíbülia. Íbini ítara, másiñati álügüdagua humá hungua: “Halíagiñe san tiabin Bíbülia? Ka isaminan tídanbei?”. Lun wasubudiruni óunabagülei, ariha waméi ida liña lan tachülürün Lererun Bungiu wamoun.
1. Wügüriña abürüdübarun Bíbülia, ida liña lisaminan lan Bungiu tídanbei?
Kéiburiñanu 40 wügüriña abürüdoun Bíbülia. Ámuñegueinarügütiña meha hawariuagua, añahein meha hóuniri mudún hadan, óuchahatiña hama urúeigu. Gumesetiña abürüdoun lidan irumu 1513 lb.l.K. ani gumú hamutu lidan irumu 98 l.l.K. Míluñein-sisi-san irumu lidura tabürüdǘn. Íbini ítara, úarati sun ariñahani le tídanbei. Ida liña lasuseredun le? Ladüga lisaminan lan Bungiu tídanbei (aliiha huméi 1 Tesalónikana 2:13). Mama hasaminan guánarügü wügüriña ha habürüdübei, “dimurei burí lúmagiñeti Bungiu hadimurehabei” lau lídehan sífiri sandu a (2 Féduru 1:21). Yusu lumuti Bungiu lani sífiri sandu lun línchahaniña abürüdei lisaminan (2 Timotéu 3:16).
2. Kátaña gayaraabei hasagarun buiti tídangiñe Bíbülia?
Sun gürigia gayaraati hasagarun buiti lídangiñe uganu buiti le tídanbei Bíbülia, meberesenga hanechanin, harasan o hererun (aliiha huméi Arufudúni 14:6). Adügaali Bungiu lun ñein tan lidan saragu iñeñein sügǘ tau furumiñeguarügü amu líburu. Bíbüliatima gíbetimabei iñeñein ídounti tásügüragüdüwa. Hiibe-agei gürigia ubouagu gayaraati hasubudiruni le tariñagubei meberesenga hererun ni halía lan heredera.
3. Ida liña lóunigirunu Heowá Bíbülia?
Lau sun luagu lan meha katei le ménrengunti lagadeirun tabürüdǘwa Bíbülia furumiñe, adügatiña wügüriña ha hínsiñehabubaña tun saragu kopia áfaagueina lun ua lan charati tidan. Íbini meha añahein lan gürigia gabafutiña álugutiña hagumuchun tau, añahein meha amu áhurera hamuti habagari lun hóunigirunu. Mígirunti Heowá lun ñein lan somu gürigia o katei adügüti lun siñá lan tachülürün Bíbülia wamoun. Ariñagati tidan redei lan Lererun lun súnwandan (Isaíasi 40:8).
SIGÍ HUMÁ AFURENDEIRA
Ariha waméi ida liña lan ladundehan Bungiu fiu wügüriña lun habürüdünu Bíbülia, ariha wameime ka lan adüga láalibei lun lóunigirunu luma lun tachülürün hamoun gürigia.
4. Ariñaga tumuti Bíbülia woun ka lan isaminan tídanbei
Ariha huméi BIDÉU. Lárigiñe, aliiha huméi 2 Timotéu 3:16 ani ábame hayanuhan luagu álügüdahani burí le:
-
Anhein wügüriña lubéi abürüdübarun Bíbülia, ka uagu lariñawagúa Lererun tan Bungiu?
-
Gayaraati san lafiñerúniwa subudigüda lani Bungiu lisaminan houn wügüriña lun habürüdüni?
5. Séfuharu Bíbülia saragu wéiyaasu luéi lagumuchúniwa tau
Anhein Lererun lubéi Bungiu Bíbülia, lunti wagurabun lóunigiruboun lan. Lidan sun dan le sügühalibei, hóuchaaña saragu gumadimatiña hagumuchun tau. Añahein meha giñe tábutigu relihión álugutiña lun maliihan hamanu gürigia Bíbülia. Íbini ítara, añahein meha gürigia íchuguti habagari lidoun denchaü lau háfaagun lun hachülüragüdünu Bíbülia hamoun amu. Lun hasubudirun aban hádangiñe, ariha huméi BIDÉU, ábameti hayanuhan luagu álügüdahani burí le:
-
Adügati san hasubudiruni weiri lan áfaaguni le adügǘbei lun tounigirún Bíbülia lun busentima humá haliihanu? Ka uagu?
Aliiha huméi Sálumu 119:97, ábameti hayanuhan luagu álügüdahani le:
-
Ka uagu híchigei saragu gürigia habagari lidoun denchaü lun tásügürawagüdün luma tafanreinhóun Bíbülia?
6. Aban líburu houn sun gürigia
Bíbülia líburu to gíbetimabei iñeñein ídounti tásügüragüdüwa ani chülütu lidoun liibe-agei fulasu ubouagu. Aliiha huméi Adügaü 10:34, 35, ábameti hayanuhan luagu álügüdahani burí le:
-
Ka uagu busén lubéi Bungiu lun tásügürawagüdün Lererun lidoun saragu iñeñein luma lun tafanreinhóun lidoun liibe-agei fulasu?
-
Lídangiñe sun le furendei humaalibei tuagu Bíbülia lidan arufudahani le, ka hínsiñetimabei hun?
Hiibe-agei
gürigia ha ubouagubaña
gayaraati haliihanu Bíbülia lidan aban iñeñein le gunfuranda hamuti
Dariwatu lidan lóugiñe
3,000
iñeñein
dayarügü o lidan fánreinti
Imprimíruaaru kéiburi
5,000 míñunu
Bíbülia
Úatu amu líburu imprimíruatu ítara
LE HARIÑAGUBEI FIU GÜRIGIA: “Aban líburu binaduharu to habürüdün wügüriña Bíbülia”.
-
Agia huguya, ka hasaminarubei?
-
Ka burí katei arufudubalin Lererun lan Bungiu Bíbülia?
LE HAFURENDEIRUBEI
Lererun Bungiu Bíbülia ani adügaali lun gayara lan tachülürün houn sun gürigia.
Águyuguagüdüni
-
Ida liña lasubudiragüdüni Bungiu lisaminan houn wügüriña lun habürüdüni?
-
Ka aweiridagüdübarun hanigi luagu anuhagua lan Bíbülia lau sun gibe hamá álugutiña hagumuchun tau? Ka gayaraabei hariñaguni luagu tásügürawagüdün lidoun amu burí iñeñein luma luagu tafanreinhóun?
-
Ida liña hasandiragun hungua lau hasubudiruni sun le adüga láalibei Bungiu lun gayara lan layanuhan hun?
FURENDEI HUMÁ LANWOUN
Furendei huméi le susereelibei tun Bíbülia lúmagiñe tagumeseha darí tásügürawagüdün lidoun burí iñeñein le uguñebei weyu.
“Cómo nos llegó la Biblia” (¡Despertad!, to lánina unsu-hati, irumu 2007)
Aliiha huméi ida liña lan tesefurun Bíbülia hawéi ǘrüwa áganiñu.
“La Biblia. Una historia de supervivencia” (La Atalaya, núm. 4 2016)
Ariha huméi ida liña lan híchuguni fiu gürigia habagari lidoun denchaü lun gayara lan hásügüragüdünu Bíbülia lidoun amu burí iñeñein.
Adügǘwaaru saragu Bíbülia, sügügüdawa tuguya lidoun saragu iñeñein. Ida luba hachoururuni masansirungili lan luganute Bungiu le tídanbei?
“Sánsiwaali san le tariñagubei Bíbülia?” (Ariñahani lídangiñeti jw.org)
a Lubafu Bungiu sífiri sándubei, keime lafuranguagüdüniwa lidan arufudahani 7.